We don’t talk anymore

Gikuptan ni Dizza ang usa ko kamot. Nakahilak na sab ko. Gigakos ko sa akong best friend. Nakabakho ko sa iyang dughan. Gihapuhap niya ang akong buku-buko. Dihang medyo miluag na ang naghuot kong dughan, mibuwag kog gakos kang Dizza. Namahid ko sa akong mga luha sa akong palad.

Sagunson kong miginhawa aron moluag pa gyud ang akong dughan.

“Now, it’s time to move on, Sheen. Nakasuway na kog frustration sa love, di ba? Pero kinahanglan mo-move on gyud ta aron di magkatawa ang laki nato.”

Mikidhat si Dizza nako. Nindot kaayo siyag smile. Nakapanglingo na lang ko ug nahikatawag hinay.

“Salamat, ha, Diz. Tinuod gyud kang friend, giunongan ko nimo ron.”

“Aw, kinsa pa man diay ang mag-inunongay sa kalipay ug kasakit bahin sa atong lovelife, ang mag-best friend gyud?”

Unya namiya mi si Dizza sa seawall. Mikuyog ko didto sa ila nga duol ra sa plasa. Nangaon mig fruit salad. May Karaoke sila si Dizza. Gidala niya kini sa ilang terrace.

“Manganta ta, Sheen. Pista na gud ugma. Maglingaw ta.”

Wa ko magtingog. Si Dizza ang unang mikanta. ‘My Way’ ang iyang gikanta. Nahikatawa ko kay with action pa siya. Klaro nga gusto kong lingawon ni Dizza. Pagkahuman niyag kanta, gitunol niya ang microphone nako. Wa dayon nako kini dawata kay diha pa gihapon sa akong dughan ang kaguol tungod sa pagpakigbuwag ko kang Gerald.

“Sige, Sheen. Ikaw ra ba ang labing nindot og tingog sa atong mga barkada. Padungga na ang mga tawo dinhi. Love song ang kantaha aron ikapagawas nimo nang kasakit sa imong dughan.”

Mitukikig katawa si Dizza. Mikatawa na lang sab ko. Gidawat ko ang microphone ug mikanta ko. Wa ko mokantag love song kay mosamot lang ang gibati kong frustration sa akong lovelife. Maoy akong gikanta ang ‘Magellan’ ni Yoyoy Villame. Na, lingawa ni Dizza ug sa mga tawo nga diha sa duol.

Nag-aper mi si Dizza pagkahuman kog kanta. Unya misulod sa terrace ang manghod nga babaye ni Dizza nga nag-eskuwela sa haysikol.

“Te Dizza, naa si Kuya Greg sa gawas. Nangita siya nimo.”

Wa dayon makatubag si Dizza. Mitan-aw siya nako. Mikalit pagkuba ang akong dughan.

(SUMPAYAN)