3 nga gi-salvage sakop sa drug group: PRO 7

Sakop sa usa ka drug group nga naglihok sa Metro Cebu ang manag-uyab nga napalgang patay sa bukirang barangay sa lungsod sa Liloan niadtong Martes.

Ang laing gipatay ug gilabay sa bukirang dapit sa dakbayan sa Mandaue nasubay usab nga ilang kauban.

Tungod niini, nakatutok na ang kapulisan sa anggulo sa drugas isip motibo sa krimen.

Matod ni Police Regional Office (PRO) 7 Director Chief Superintendent Debold Sinas nga milutaw na ang ngan ni Stephen del Corro lakip na si Mata nga nakalinya sa usa ka dakong drug group nga naglihok sa Metro Cebu.

Ang ilang pangulo naa sa sulod sa bilangoan.

“Our investigation now is geared on the drug activities adtong lalake, including yung babae. They are link to one group that we have strong evidence to that,” matod ni Sinas.

Apan nagdumili pa pagbarog ang mga saksi sa kapulisan nga magtumbok nga ang tulo lakip sa dakong grupo nga nagpadagan sa illegal nga drugas sa Sugbo.

Sa background investigation, hinigugma sa maong drug lord ang usa sa mga namatay.

Gani magbisitahan kini sa iyang selda nga wa lang una nganli ni Sinas kon asa nga pasilidad samtang nagpadayon ang ilang imbestigasyon.

Sa kuha sa CCTV camera nga naa sa kustodiya ni Cebu City Councilor Dave Tumulak, nasuta nga upat ka mga lalake ang ning-pick up sa mga biktima gikan sa apartment nga giabangan ni del Corro sa Subangdaku, siyudad sa Mandaue.

Apan giklaro ni Sinas nga di pa nila mailhan kon kinsa ang maong mga tawo tungod kay di maklaro ang mga panagway niini.

Dako ang pagtuo sa kapulisan nga ang hinungdan nga sila gipangpatay tungod sa dakong utang sa illegal nga drugas apan kining tanan angay pa nilang subayon.