Unsa man gyud SBP?

MAO na ni epekto karon sa nahitabong karambola sa duwa tali sa Gilas Pilipinas ug sa Australia Boomers niadtong Hulyo 2 sa Philippine Arena alang sa qualifying round sa Fiba World Cup.

Gawas sa mga silot nga gipahamtang sa Fiba ngadto sa 10 ka mga players sa Gilas ug sa duha ka mga coaches niini, nasakripisyo na usab karon ang atong partisipasyon sa 2018 Asian Games sa Agusto 18 ngadto sa Septiyembre 2 sa Indonesia.

Kini gumikan kay sa niaging adlaw, naliso ang utok sa Samahang Basketball Ng Pilipinas (SBP) ug nakahukom kini ultima hora nga dili na lang mopadala og team sa 2018 Asian Games.

Ang rason kay ang PBA Board padayon nga niinsister nga maoy ilang tumanon ang unang tanyag nga usa lang ka team ang morepresentar sa Pilipinas ngadto sa Asiad.

Ang TNT Ka Tropa man unta to ang ipadala pero nausab ang kamada dihang upat ka mga sinaligan niini nga sila si Troy Rosario, Terrence Romeo, RR Garcia ug Jayson Castro, apil usab ang naturalized nga si Andrey Blatche ang gipangsuspenso sa Fiba.

Aron makatuman ug pagsalbar sa ilang commitment sa matag upat ka tuig nga Asian Games, nakombinsi ug gihatagan sa PBA sa ilang pagtugot ang Rain or Shine Elasto Painters nga mao nalay morepresenta sa nasod – butang nga gihangop sa management sa ROS ug sa SBP – ug kini ubos sa pagdumala ni coach Yeng Guiao.

Duna nay mga players sa ubang mga PBA teams nga gihinganlan si coach Yeng Guiao nga mo-reinforce ug gani aduna na usay ubang mga players nga nipadayag na sa ilang kaikag mga moduwa tungod ug alang sa nasod.

Pero ambot og unsang pagka-unsaa nga nilubad man lang og kalit ang SBP.

Tungod lang niini, nanalaw ang SBP sa dako untang hagit sa ilang kapabilidad? Ilang gitulon ang ilang gipamulong ug gipasalig sa publiko.

Ilang giusikan ang kahigayonan nga mapalig-on og balik ang nagusbat nga imahe sa Gilas Pilipinas.

Lisod tuohan ang pasumbingay nga ang pag-withdraw sa Asian Games makahatag og higayon nga kita makapreparar sa sunod international competition.

Tell it to the marine, Mr. SBP President Al Panlilio.

Kanus-a ra gud ta makapreparar og tarong. Di man gani halos makompleto sa praktis.

Kon makapadala ta sa tibuok puwersa sa TNT Ka Tropa alang sa Asian Games nganong di man mahimo ngadto sa Rain or Shine nga aduna say igong reinforcements?

Mao gyud unta ning panahon nga ipakita nato nga wa kita maapektohi taliwala sa nahitabo ug labaw sa tanan ipamatuod nga dili kita makamaong motalikod sa atong pasalig sa way igong rason.

Ang kalit nga pag-withdraw sa kompetisyon usa ka tinalawan ug wala kini sa bokabularyo sa pulong nga sportsmanship.