Homeowners associations gipatabang sa seguridad sa Ironman 70.3
Gitigom sa Lapu-Lapu City Police Office (LLCPO) ang mga presidente sa Homeowners Associations (HOA) sa Lapu-Lapu niadtong Biyernes sa hapon sa Tourism Office Conference Room, sa City Hall sa Barangay Pusok.
Gipangulohan ni P/Supt. Mark Sucalit, hepe sa City Intellingence Branch (CIB) sa LLCPO ang tigom.
Tinguha niini ang pagpaligon sa pagbantay sa seguridad sa umaabot nga Ironman 70.3 Asia-Pacific Championships 2018 karong sunod Dominggo.
Moabot sa 18 ka mga presidente sa HOA ang nitambong sa tigom.
Plano niining kalihukan nga mas mapalig-on pa ang pagdumala sa kahusay ug kalinaw sa nagkadaiyang mga dapit nga ubos sa responsibilidad sa LLCPO.
Tumong usab niini nga ang mga pangu sa HOA moabag sa paghatag sa LLCPO sa mga impormasyon nga may kalabutan sa pagsumpo sa kriminalidad.
Ang tigom gitambungan usab ni LLCPO officer-in-charge (OIC) P/SSupt. Lemuel Obon.
Nahisgutan usab sa kalihukan ang observation ug description exercise; criminal profiling, pagpadayon sa hugot nga koordinasyon, kooperasyon ug kolaborasyon sa kapulisan ug komunidad; ug daling paghatag sa mga impormasyon nga makuha o nakuha nga may kalabutan sa seguridad.
Giawhag usab ang mga pangulo sa HOA sa pagpahibalo sa kapulisan kon adunay bagong mga tawo nga mamumuyo sa ilang area of responsibility.