2 KA PILOTO NAG-AWAY SA PAGKAON
Gisuspenso na sa Iraqi Airways ang duha ka mga piloto nga nagsumbagay atol sa ilang flight tungod sa pagkaon.
Nag-away ang piloto ug ang iyang co-pilot samtang nagpalupad sila sa eroplano padung sa Baghdad, Iraq, luwan ang 150 ka mga pasahero.
Nigikan ang abyon sa siyudad sa Mashdad, Iran.
Apan bisan sa kagubot, malampuson napatugpa sa duha ang eroplano sa Baghdad.
Gibutyag sa report sa Agence France-Presse (AFP), nagsugod ang lalis sa duha human giingong gibadlong sa piloto ang usa ka cabin crew nga nagdala og pagkaon alang sa iyang
co-pilot gumikan kay wala kini pagtugot gikan niya.
Sa suwat ngadto sa tagdumala sa Iraqi Airways, ang co-pilot, nga wala nganli, nipasabot sa iyang habig sa panghitabo.
Sugilon niya, nasuko ang piloto kay wa siya mananghid nga dad-an og pagkaon sa cabin crew.
Siya nangangkon nga gipasakitan siya sa piloto ug giinsul- to hinungdan nga nipataliwa nila ang usa ka security agent.
Human malampusong napatugpa ang eroplano sa Baghdad, nag-away og balik ang duha ka mga pilotong lalake ug nagsumbagay.
“I had to defend myself,” sumala sa co-pilot nga niangkon nga nibawos siya piloto.
Nihimo na og imbestigasyon ang transport ministry sa hitabo aron patubagon kon kinsa ang angay nga manubag.
Samtang nilusad usab og kaugalingong imbestigasyon ang Iraqi Airways.
Gipasalig niini nga dili makalingkawas sa labing bugat nga mga silot ang duha ka mga piloto.
Apil sa gitan-aw nga ipahamtang nga silot mao ang pagdili nila sa pagpalupad na og eroplano sa tibuok nilang kinabuhi.
Nasubo ang mga opisyal sa kompaniya nga pagkaon lang ang nakaingon sa away.