Sibilisado

Nag-viral ang video sa usa ka lalake nga gituohang kuwang sa pangisip nga gikulata ug gihulog sa creek sa Barangay Tejero, Dakbayan sa Sugbo. Gitahan sa barangay officials ang tulo, ang usa niini mao ang nag-video sa hitabo niadtong Mayo ug nag-upload bag-ohay lang.

Gikondenar sa netizens ang hitabo tungod sa kagrabe sa gidangatan sa batan-ong lalake nga way dag-anan bisan gamay sa duha ka mga tawo. Gihimong punching bag ang iyang nawong ug di pa igo, gibunalbunalan ang mga tiil.

Apan duna say miabiba kay angay lang kunong bun-ogon ang mao nga lalake kay kawatan. Nailhan siya sa Tejero nga mangawatay busa angay lang kunong kulatahon.

Dunay mga tawo nga wa makasabot sa sitwasyon. Tinuod man ang pasangil, apan wa kini maghatag og katungod sa mao nga mga tawo, o ni bisan kinsa, nga modagmal, labina kon tinuod nga kuwang sa pangisip ang mao nga lalake. Gihulagway kining susama og pangutok sa usa ka bata.

Kon nakapangawat siya, gidakop ug gitugyan ngadto sa mga awtoridad aron kapasakaan og kaso sa hukmanan. Naa ra sa hukmanan ang pagdeterminar kon naa ba sa hustong pangisip ang mao nga lalake o tinuod bang kuwang.

Dunay balaud nga gitamdan ang usa ka katilingban nga sibilisado. Naa sa balaud nga ang usa ka tawo kanunay nga giisip nga inosente hangtod nga mamatud-an atubangan sa korte nga sadan. Busa, kinahanglan nga ang nakahimog salaud angay ikiha.

Ang pagpanagmal o pagpaantos usa ka buhat niadtong karaang panahon nga di pa kaayo sibilisado ang katilingban. Si bisan kinsa mahimong modagmal o mopatay kon masakpan nga nakasala.

Apan sa moderno ug sibilisadong katilingban karon, makapahimangod nga dunay mga tawo nga kinaraan gihapon ang kahimtang sa panghuna-huna.