Dawat Limpiyo

Binasi sa 2 Hari 4:42-44; Salmo 145; Taga Efeso 4:1-6; Juan 6:1-15

Dili usa ka pagdayeg kon pasanginlan kita nga modawat og limpiyo. Sa ato pa, nakadawat kita og butang, ganti, o kahimtang nga wala nato budlayi. Lain ang nagbudlay, midawat lamang kita og limpiyo. Morag gipasabot nga kita tapulan, hangtod lang sulti, apan aduna lang gihapoy nadawat. Usahay usab, ang modawat og limpiyo, suwerte. Wala niya damha nga aduna siyay madawat, apan daw nahulog ang grasya sa iyang paa.

Daghan ang misunod kang Jesus tungod sa mga milagro nga iyang gibuhat. Duol na ang Pangilin sa Pagsaylo sa mga Judio. Nagpahinumdom ang maong pangilin sa pagpagawas sa mga Judio gikan sa kaulipnon sa Ehipto. Tungod kay wala silay gahum, makaingon ta nga midawat lamang sila og limpiyo sa ilang kagawasan gikan sa Dios nga maoy nagpagawas kanila.

Apan aduna pay laing dawat-limpiyo nga nahitabo. Gisulayan ni Jesus si Felipe: “Asa kita mamalit og pan aron ipakaon kanila?” Mitubag kini: “Duha ka gatos ka denario nga pan dili paigo alang kanila aron tagsatagsa makadawat og bisan gamay.” Tinuod man sad. Iya na kining gikuwentakuwenta. Niining yugtoa adunay mitumaw nga grasya: “May usa ka batang lalaki dinhi nga adunay lima ka buok pan nga sebada ug duha ka buok isda. Apan unsa man kini alang sa hilabihan ka daghan nga mga tawo?” Grasya, apan adunay gihapoy gapugong sa pagtuo.

Sayod kita sa nahitabo. Gipadaghan ni Jesus ang pan ug isda. Nakakaon ang lima ka libo “kutob sa ilang gusto.” Nangabusog sila ug aduna pay naghingapin nga nahabilin. Pwerteng busoga. Midawat og limpiyo ang mga tinun-an. Tungod niini, buot nilang himuong hari si Jesus. Buot nilang makadawat og limpiyo kanunay.

Sebada usab nga pan ang gidalit ni propeta Elias ngadto sa usa ka gatos ka tawo. Misupak pod ang iyang tinun-an. Ang sebada usa ka baratohon nga pan. Sama kini sa pan sa bata sa ebanghelyo. Nakakaon ang tanan.

Gipahinumdoman diha sa sulat ngadto sa mga taga Efeso nga sa dihang nabunyagan kita adunay kita nadawat nga mga espirituhanong gasa lakip na ang grasya sa “panaghiusa sa espiritu pinaagi sa bugkos sa panagdait.” Limpiyo kini natong nadawat. Ampingan ug amomahon lamang nato.

Matag usa kanato adunay nadawat nga limpiyo gikan sa Ginoo. Dili kita takos nga modawat niini. Matag usa usab kanato adunay sebada nga ikahatag sa Dios. Dawaton kini niya kon ato kining ihalad ubad sa halad sa kaugalingon sa iyang anak nga si Jesucristo.

Taliwala sa mga hagit ug pagsulay nga atong gisagubang isip matutuo ug isip sakop sa katinglingban, hinumdoman gayod nato ug pasalamatan ang mga gasa nga gikan sa Ginoo ug padayonon nato pagabri sa kamot ug kasingkasing ngadto kaniya aron kita mabusog sa tinuoray.

Unsa may atong mga dawat-limpiyo gikan sa Ginoo? Giunsa man nato pagdawat niini?