Sulbad sa pag-antos

Niadtong Lunes, kay sakit ang akong wala nga kiting ug medyo sakit ilakaw, nakahukom kong mosikad sa karsada aron ako usab matino ang kalainan sa kahimtang sa trapiko ,ang kaniadto ug karon. Taudtaud na kong wa makatindak sa kadalanan kay sa bukid na ko magkanunayan.

As usual, kay hapon na, ang bul-og sa mga sakyanan padung sa norte kay tingpauli na man. Ang kahimtang sa trapiko gikan sa alas 5 ngadto sa alas 9 sa gabii terible kaayo. Niadtong mag PUJ o mag-taxi, doble ang igo. Gawas nga antusan ang kahuot sa mga sakyanan, mag-inilugay pa sa pagsakay. Doble ang kalbaryo sa pag-uli. Kon mogawas kag alas 5 sa tunghaan o trabahoan, expect nga labing sayo kang mauli alas 7:30, kana kon naa ka sa siyudad ug mopauli ka sa Pit-os.

Tuod man, mga alas 6 pasado sa gabii, nipauli na ko padung sa amoa subay sa Banilad. Sumpot sumpot ang mga sakyanan, apan kay biseklita ang akong gisakyan, nakasubay ra ko sa daplin. Mas mosalig ko sa mountain bike kay sa scooter kon mga libaong na ang hisgutan tungod sa wheel size. Bisan hinayhinay ang tindak kay huot ang mga sakyanan, nauli kong mas dali. Tingali, gintang og mga 45 minutos kon four-wheel ang akong gisakyan sa naandang kahimtang sa trapiko.

SOLUSYON

Daghan ang magsige og yawyaw sa trapiko nga unta, ang biseklita ug motorsiklo maayong mga solusyon. Ambot lang, kon lima lang ka kilometro ang kalay-on, di ka na panington sa imong pagsikad kon maanad ka na. Unya, daghan ka pang makuha nga benepisyo, labina sa panglawas kay kini ehersisyo.

Mokombate ni sa imong stress sa trabaho, mo-detox sa imong lawas ug mopanindot sa porma ini, labina kon ubanan sa disiplina sa diet. Unya, makadaginot o makatigom ka pa.

Mao ni ang labing simple nga solusyon sa kanunay nga pagkatanggong sa trapiko-biseklita ug kon mas maka-afford, motorsiklo. Kon magsige ka lang og yawyaw sa grabeng kahimtang sa traffic, mosamot ang imong stress.

DUGAY PA

Sa kahinay sa kagamhanan sa pagpatuman sa mass transportation projects, pagpaabot nga katuigan pa ang lanaton una makuhaan ang pag-antos nato aning kahimtang sa trapiko. Busa, di nato angay isalig ang tanan sa gobyerno. We can do something by

acting, inay nga magsige lang kita og yawyaw.

Di kuyaw ang pagbiseklita kon kahibawo ka lang mag-amping. Inay magyawyaw ka, himog lakang. Ang solusyon, naa ra sa imong duha ka mga kamot ug duha ka mga tiil. Tindak na.