We don’t talk anymore
Kadlawon pa gani nagatang na kog sakyanan balik sa siyudad kay klase man. Mi-absent man ko gahapon kay pista man sa among lungsod. Daghan pang tawo sa plasa ug sa kadalanan. Nagbuntag ang mga namistahay kay daghan mag kalingawan ug duna pa gyuy disco.
Dali ra kong nakasakay og minibus. Katulgon pa ko apan gusto man kong matulog, wa gyud ko makatulog. Si Greg ang akong gihunahuna. Hilom kong nangandoy nga mangulitawo siyag usab nako. Nabatyagan ko karon sa akong kaugalingon nga na-in-love na ko niya.
Malipay gyud si Dizza kon tug-anan ko siya sa akong gibati karon kang Greg. Dakog gusto ang akong best friend nga si Greg ang akong sugton kay buotan man kini. Apan unsaon man ning pinitik sa kasingkasing nga di man gyud kabalibaran. Si Gerald ang akong love maong siya ang akong gisugot.
Midiretso ko sa university nga akong gitunghaan pagabot nako sa siyudad. Sa canteen na lang ko namahaw. Apan wa koy ganang mikaon. Nawala na ang love ko kang Gerald ug karon si Greg na ang kanunay kong mahunahuna. Morag mas bug-at ang love ko kang Greg kay sa gibati kong pagmahal kang Gerald kaniadto. Na, true love na tingali ning gibati ko kang Greg?
Aw, di man sab ko magbasol kon kami si Greg ang magkarelasyon. Nabatyagan ko nga love gihapon ko niya hangtod karon.
Pagka gabii, nahasol na sab ko. Dugay kong nakatulog sa sigeng hunahuna kang Greg. Kon di pa lang ngil-ad sa usa ka babaye, na, ako nang ingnon si Greg nga nahigugma na ko niya. Apan ngil-ad man kini. Ang akong buhaton karon, maghuwat na lang gyud ko sa panahon nga pangulitawhan ko ni Greg. Anang higayona, sugton dayon nako siya.
Usa ka hapon nga nag-uwan, wa dayon ko makasakay og dyip paingon sa gipuy-an kong boarding house. Diyotay ang namasahero kay nagbaha man ang mga dalan sa downtown. Nakahunahuna ko nga sa Jollibee na lang manihapon. Alas sayis na niadtong tungora.
Ug samtang nagkaon ko, nakatan-aw ko sa babaye ug lalaki nga nanulod sa Jollibee. Nag-holding hands sila ug nasabtan nako nga malipayon sila. Kalit kong gikulbaan.
(TAPUSON SUNOD GULA)