LIMA KA DEKADA PAGSINABTANAY
Nagsugod sa pagpalit og bugas ang love story sa magtiayong Francisco ug Milagros Berden hangtod nisangko sa pagbinayloay og saad atubangan sa Ginuo.
Karong bag-o, ang magtiayon nilab-as sa ilang saad sa kasaulogan sa ika-50 nga anibersaryo sa ilang kaminyuon.
Unang nag-abot ang ilang dalan sa lungsod sa Pamplona, Negros Oriental, silingang lalawigan sa Sugbo.
Si Milagros o Mely nipalit og bugas sa canteen nga gitrabahoan ni Francisco o Francis diin nagtrabaho usab ang iyang amahan nga si Santiago.
Si Francis nga maguwang og 12 ka tuig ni Mely, nitutok niini samtang nagpalit og bugas.
Hangtod nga namisita na si Francis nga 28 anyos niadtong higayona kang Mely nga nagedad pa lang og 16.
“Wala pa mi klaro ato nga uyab kay wa koy buot atong higayona hangtod nga nakapuyo siya sa among balay kay gipapuyo sa akong papa, mao nato,” sugilon sa 66 anyos nga ginang sa sinugdanan sa ilang gugma sa iyang 78 anyos nga bana.
Unsay sekreto sa ilang relasyon nga ming-abot og 50 ka tuig?
“Sinabtanay sa pagpuyo... Sige og kuyog ug walay selosay,” daling tubag ni Mely uban sa agik-ik.
Paambit niya nga kausa lang sila nag-away sa iyang bana mga 20 ka tuig na ang nakalabay dihang nipalit kini og tsinelas alang sa ilang anak ug niuna siya og uli diin natagbaw og pangita niya si Francis.
Ang duha unang nakasal niadtong Hulyo 7, 1968 sa simbahan sa Pamplona.
Niadtong Hulyo 7, 2018, gilab-as nila og balik ang saad sa usag-usag atol sa ilang 50th golden wedding anniversary sa Our Lady of Mt. Carmel Parish sa Lutopan, siyudad sa Toledo, Sugbo ug ang salo-salo gisunod sa Staff Clubhouse sa Carmen Copper Corporation.
“Way nausab sa gugma namo, mao lang gihapon bisa’g tigulang na,” matod ni Mely.
“Magsinabtanay pud sila aron molahutay ang ilang pagpuyo,” tambag niya sa ubang magtiayon labi na kadtong bag-o lang gipangkasal.