RoS ANDAM GIHAPON
PBA board nausab ang desisyon?
Bisan paman og niatras ang Samahang Basketbol ng Pilipinas (SBP) apan andam ug determinado gihapon ang Rain or Shine (ROS) nga mopadala sa ilang team para sa 2018 Asian Games didto sa Jakarta, Indonesia.
Kini ang gikumpirmar ni PBA Commissioner Willie Marcial ug mga tag-iya sa ROS nga silang Raymund Yu ug Terry Que aron adunay mo-representar sa Pilipinas sa matagupat ka tuig nga Asiad.
“Anytime okay yung Rain or Shine. Kung gusto nilang magpadala bukas o mamaya, okay kami,” matod ni Marcial atol sa press conference sa mga miyembro sa league board sa Smart Araneta Coliseum sa wa pa ang game one sa Commissioner’s Cup finals sa San Miguel ug Barangay Ginebra.
“All-out pa rin ang Rain or Shine, all-out pa rin ang PBA,” dugang ni Marcial.
Si Al Panlilio, presidente sa SBP nianunsyo pipila ka oras human sa ilang meeting uban sa PBA Board nga dili mopadala og team ang SBP ngadto sa Indonesia uban sa pag-ingon nga gikinahanglan pa ang pag-regroup sa mga player ug opisyal aron ilang iprotesta ang silot sa Fiba ngadto sa 10 ka players ug 2 ka coach.
Lain nilang rason mao nga way igong panahon alang sa preparasyon ug nangandam ang Pilipinas para sa Fiba 2023 apan wala matagbaw ang mga fans sa ilang rason.
Ang pinakabug-at nga rason nga gipadayag ni Panlilio mao ang giingong wala pagsuporta sa PBA Board sanglit atol sa ilang meeting, gihimug-atan sa Board nga ang team ra nga nitanyag maoy ipadala sukwahi ubang representasyon sa Pinas nga magkuha og tagusa ka player gikan sa 12 ka team sa PBA.
“As Comm. Willie [Marcial] said, the decision was Rain or Shine, one team na lang kasi hindi nga makaka-adjust yung PBA...“Last board meeting, one team lang para ‘di masira ang sched,” matod ni Panlilio.
Gipasabot nga kon daghan ang kuhaon nga player, maglisod og adjust ang PBA sa schedule sanglit 15 ka adlaw nga mawala ang ROS para sa Asiad ug si Jeff Chan nga gustong kuhaon ni Coach Yeng Guiao nga maoy motimon unta sa ROS, kasamtangang nagduwa sa Finals.
NIHUMOK ANG PBA BOARD?
Human gianunsyo sa SBP nga di ipadala ang ROS, ang PBA Board nireklamo nga wala sila personal nga gipahibawo sa SBP may labot sa ilang nahukman nga desisyon.
Ang mga board members nga sila Rene Pardo (Magnolia), Robert Non (San Miguel), Alfrancis Chua (Barangay Ginebra), Dickie Bachmman (Alaska), Atty. Raymund Zorilla (Phoenix) Bobby Rosales, (Columbian Dyip), ug Eric Arejola (Globalport) susama og mga sentiyemento nga wala sila mapahibawo sa SBP sa desisyon niini nga mo-withdraw sa Asiad niadtong Huwebes sa gabii.
Ang Elasto Painters, uban sa tulo ka cadet players ug pito ka lain sa nagkadaiyang PBA ballclubs, lakip unta sa Asiad pool.
“Parang nalaglag kami,” matod ni Zorilla dihang nihatag siya sa iyang reaksyon kabahin niini diin sila mismo ang uwahi nga nakahibaw.
“We all knew we will be going and we will be joining and supporting them,“It’s an open relationship and we could have been informed about any decision and not just through social media,” dugang sa opisyal sa Phoenix.
Bisan og nasakitan apan matod sa board nga padayon sila nga mosuporta sa SBP.
“Hanggang ngayon still the same ang support ng PBA, allout yan,” padayag ni Non kinsa maoy representante sa PBA Board sa San Miguel.