GINKINGS MIHUBOG SA BEERMEN
Nagmangtas si Justin Brownlee aron pangulohan ang Barangay Ginebra Kings batok San Miguel Beermen 127-99 atol sa game one sa best-of-seven series sa sa Philippine Basketball Association Commissioners Cup Finals didto sa Smart-Araneta Coliseum.
Si Brownlee nga daw nasudlan og dautan nga espiritu human iyang napasulod ang 17 sa iyang 19 ka itsa aron irehistro ang iyang 42 puntos batok sa inilog nga SMB.
Si Brownlee kausa ra nasipyat sa iyang mga itsa sa unang 24 minutos sa duwa aron itali ang iyang 29 puntos nga gitambungan sa dul-an 12,000 ka mga fan didto sa Araneta.
Gihangop ni Coach Tim Cone ang iyang mga batos ug nihulagway nga swerte sila kay nanulog ang ilang mga itsa bisan asa.
“It was just one of those nights where we had it and they didn’t. We were firing on all cylinders, that got them on their heels early and we didn’t let up,” mtod ni Cone.
Ang SMB gipangulohan ni Renaldo Balkman pinaagi sa iyang 27 puntos ug 13 ka rebounds ug niamot usab og 26 puntos si Christian Standhardinger apan wa gihapon mosalir ang ilang opensa batok GinKings.
Ang four-time MVP nga si June Mar Fajardo nipakatap og 13 puntos ug 12 ka rebounds ug iyang nalupigan ang iyang kontra nga si Greg Slaughter kinsa nitali og 11 puntos ug 7 rebounds.
Si Fajardo niingon nga paningkamotan sa ilang team nga makabangon gikan sa pagkahagsa ug itabla ang series.
Nakadawat usab og igong suporta si Brownlee human nipaarak og 20 puntos si Joe Devance ug 11 puntos ang giamot ni Mark Caguioa.
Ang GinKings nakapasulod og 51 gikan sa 83 ka field goals samtang 39 gikan sa 100 ka itsa ang nahimo sa Beermen.
Si Brownlee nangandam na sa hugot nga depensa nga ipahamtang kaniya ni Coach Leo Austria sa SMB atol sa ilang ikaduhang duwa karong Dominggo sa samang venue.
Mao sab ang pangagpas ni Cone sanglit suhito na siya sa Beermen nga dili kini magpalupig ug mohimo sila og adjustment para sa game 2.