Durant, Harden ug Westbrook nangulo sa USA

Bisan kon wala si LeBron James, apan dili gihapon bastabasta ang Team USA sanglit gilangkuban gihapon kini sa mga maayong laki nga magduduwa sa National Basketball Association.

Kini gilangkuban sa 2017 NBA MVP nga si James Harden, 2016 NBA MVP Russel Westbrook ug back-to-back NBA Finals MVP ug 2013 NBA MVP nga si Kevin Durant diin sila ang nangulo sa duha ka adlaw nga training camp sa USA nga gidumala ni coach Gregg Popovich nga maoy national coach.

Gawas ni James, wala usab sila si Stephen Curry, Kawhi Leonard, Klay Thompson ug Draymond Green kinsa wala motunga sa wala pa matino nga rason.

Apan ang Hall of Fame coach nga si Popovich niingon nga iyang gisabot ang wala pagtunga sa maong mga star sa NBA sanglit adunay igong abilidad ang mga player nga nitunga sa training camp.

“People have lives, we had a good number of people here and the people who were invited that aren’t here have reasons, whether it’s injury or personal things going on in their lives. And we understand that.” Padayag sa coach sa San Antonio Spurs kinsa maoy nihulip kang Mike Krzyzewski.

Gidayeg niya silang Kyrie Irving, Gordon Hayward ug DeMarcus Cousins kinsa nitunga taliwa sa ilang gidaladala nga injury.

Si Popovich nikuha og tagsatagsa ka mga player gikan sa lainlaing mga team sa NBA aron maoy mokumpleto sa iyang line-up kinsa maoy iyang pilian sa ilang final 12 aron maoy morepresenta sa USA sa ilang sunod nga duwa batok sa laing mga nasod.