Pulis diay?

Hitman? Gahapon sa buntag samtang nagprograma mi sa “Frankahay Ta” (dyCM1152AM) gi-ambush si kanhi Tejero Kap. Jessielou Cadungog sa riding-in-tandem apan nakalingkawas ug ang napusilan-patay ang hitman, nga gidudahan nga usa ka pulis, kay nakabawos man ang kauban ni Cadungog sud sa iyang sakyanan.

Sa akong pagsuwat ning akong lindog kagahapon sa buntag wa pa gibutyag ang ngalan sa hitman. Apan ang giingon nga driver sa motorsiklo nailhan nga usa ka pulis, matud pa ni Cebu City Councilor Dave Tumulak, nga maoy nagdala ngadto sa hospital kay nasamdan man.

Si Cadungog, nga karon konsehal na sa Tejero, nagsakay sa iyang mahalon nga FJ Toyota Cruiser ug mga kauban dihang gipusil ang iyang sakyanan dapit sa Villagonzalo 2, nga sakop sa Tejero, sa nagsakay og itom nga motorsiklo. Apan malas ang hitman kay dunay kauban si Cadungog nga armado, nga maoy nakapusil-patay sa hitman.

Ang tawo nga giingon nga nakakita sa maong panghitabo gidala kagapahon sa opisina sa Criminal Investigation and Detection Group kon CIDG. Kinahanglan nga mahatagan og proteksyon ning testigo aron mogawas ang tinuod nga storya sa panghitabo.

Kinsa ang mga armado nga kauban ni Konsehal Cadungog, nga maoy nakapusil-patay sa gituhoan nga hitman? Lain pangutana, unsa man diay sala sa katilingban ni Konsehal Cadungog nga gibirahan man siya? Nahilambigit siya sa ilegal nga negosyo?

Atong mahinumduman nga miboto nga ngalan ni Konsehal Cadungog dihang napusilan-patay si kanhi SPO1 Adonis Dumpit atol sa operasyon sa NBI ug pulis didto sa Tagbilaran city tungod kay ang kalibre .45 nga nakuha sa posesyon ni Dumpit nakalesensya sa ngalan ni Cadungog.

Kon ugaling tinuod nga ang mibira ni Konsehal Cadungog mga pulis mosamot og kadaut ang imahin sa atong kapulisan. Bisan ingnon tang pung nga dunay dakong sala si Cadungog apan ang plano pagpatay kaniya dili sibo sa atong sistema ug pamalaod. Gipasakaan unta og sumbong si Cadungog kon duna siyay kalapasan sa balaod.

Tungod sa nahitabo kang Cadungog, luoy ang PNP karon kay sila na unya ang malintian sa tanan pagbasol sa mga parente sa ubay-ubay na nga napusilan-patay kon biktima sa riding-in-tandem sa nangagi dinhi sa Sugbo.

Sa nahitabo kagahapon nga, matud pa usa ka pulis ang napatay, unsaon kaha sa pagpasabot sa mga kadagkoan sa pulis sama ni PRO-7 Chief Debold Sinas sa katawhan ug ni Cebu City Mayor Tomas Osmeña, nga mireklamo na nga di na luwas ang dakbayan sa patay.

Labing seguro nga si General Sinas monegar sa maong hitabo. Kay sa tinuoray, way opisyal sa pulis nga mosugo og pulis aron mopatay sa mga tawo nga gidudahan o gituhoan nga dunay kalambigitan sa ilegal nga negosyo. Apan ang nahitabo kagaapon, ang mga tawo pirmi na magduda kon unya dunay mapusilan-patay.

Usa ka retirado nga pulis, nga akong higala, di makatuo sa nahitabo kagahapon. Pung pa sa akong higala.