Tom Cruise
Maorag way kamatayon sa M.I
Usa sa akong bucket list nga motan-aw yud sa ikaunom nga sequel sa “Mission Impossible” ug natuman ni niadtong Dominggo.
Di ko ganahan sa ubang pelikula ni Tom Cruise pero sa papel niyang Ethan Hunt sa Mission Impossible movie series, moangkon ko nga fan kaayo ko sukad pa sa unang M.I. niadtong 1996.
Ug samtang nagkaedad si Cruise, samot man hinuong nagkanindot ug nagkakuyaw ang iyang mga daredevil stunt sa iyang “Mission Impossible-Fallout.” Wa kuno siyay double ha. Ngilngiga.
Dili ang estorya o ang plot ang nagdag bida sa Fallout kundi ang kulbahinam niyang mga aksyon.
Naay niambak siya sa mga habug nga building, nagpabulhot og motorsiklo sa traffic sa Paris nga way head gear, nibitay sa helicopter sa wa pa niya patuyoka og 360-degree barrel roll.
Ang makapakitbi sa atay ang iyang paglupad gikan sa arypolano nga dunay 25,000 feet ang gihabugon ug katong sa dayong katapusan nga nagbitay siya sa kabatoan.
Lupigon ang superhero movies aning gipangbuhat ni Tom Cruise sa Mission Impossible. Basta di yud mo magmahay sa inyong P230. Ingna kong bakakon. Hehe…
WISH KO LANG! Agusto na man diay ugma. Sunod ani “ber” na. Unya bonus dayon. Haha.. Bitaw uy, gubaon naman gud ni akong laptop. Usa sa akong bucket list nga makapalit na unta og bag-ong laptop. Wish ko lang!
Karong Agusto, ubay-ubay sa mga teleserye ang mobabu na. Sa Kapamilya, ang “Since I Found You” nilang Piolo Pascual ug Arci Munoz ug ang “Bagani” ni Liza Soberano ug Enrique Gil.
Samtang sa Kapuso, ang “Kambal Karibal” nilang Bianca Umali ug Miguel Tanfelix.
Mas nindot nang ingon ana nga mahuman dayon. Kapoy kaayo nang patuyukon-tuyokon, palangay-langayon aron lang yud moinat ang estorya. Pareho sa Probinsyano nga maorag kita ra may giilad anang salidaha. Haha…
KUSINA KINGS
Unsa ning “Kusina Kings” nilang Zanjoe Marudo ug Empoy Marquez nga nakigdungan man og salida sa Mission Impossible.
Lingaw ra ba sad ning “Kusina Kings” kay ang direktor ani ang Cebuanong si Victor Villanueva nga mao say direktor niadto sa Patay Na Si Hesus. Apektado
yud ang ilang kita tungod sa Mission Impossible.
Ugma, showing na pud ang “BuyBust” ni Anne Curtis. Hala, kadaghang nindot salida.
CHIK CHOW
Human ninyog tan-aw og sine, akong i-recommend ninyo ang “Larangan sa Chik Chow Restaurant” kay P10 ra ang mais og humay ug init kaayo ang sabaw sa larang. Naa pa yuy sinugbang manok, isda, dinugoan ug uban pa. Naa ra ni dapit sa Mango ave. atbang sa USC Boys High. Ingna nakabasa mong AC Martin aron hatagan mog discount. Hehe…