GICA NIASUMER NA PAGKAMAYOR
Gibali sa Court of Appeals ang na-unang desisyon sa Office of the Ombudsman nga nagtaktak kang Dumanjug Mayor Efren Guntrano “Gungun” Gica sa katungdanan.
Ni-apelar si Gica sa CA human gimando sa Ombudsman ang iyang dismissal sa miaging tuig tungod sa isyu sa gipaburot nga resibo o bayranan sa usa ka restaurant niadtong 2014.
Gikompirmar hinuon ni Bise Mayor Reneiro Asentista nga ni-asumer na usab pagbalik pagka-mayor si Gica ug nibalik siya pagka-bise mayor kagahapong adlawa.
Gimando sa CA ang pagbali ug pagpadaplin na sa desisyon sa Ombudsman niadtong Hulyo 27, 2017 nga nagtaktak kang Dumanjug Mayor Gungun Gica sa katungdanan.
Sa nasayran, gimando sa Ombudsman ang dismissal ni Gica tungod sa serious dishonesty ug grave misconduct nunot sa isyu sa gipaburot bayranan sa pagkaon atol sa seminar Association of Local Budget Officer niadtong Abril 24-26, 2014.
Gitumbok sa CA, ang Aguinaldo doctrine o ang doctrine
of condonation maoy nakaluwas ni Gica niini.
Giuyonan ni Association Justice Marilyn Lagura-Yap sa CA Special Eighteenth Division dinhi sa Sugbo, ang argumento ni Gica nga mo-apply kaniya ang Aguinaldo doctrine sanglit ang pasangil batok kaniya nahitabo niadtong 2014 diin usa pa siya ka bise mayor apan napili man siya pagka-mayor niadtong 2016 elections.
Matod sa CA, dihang naduso ang reklamo batok ni Gica niadtong 2014 wala pa gi-abandonar sa Korte Suprema ang doctrine of condonation busa mo-apply pa kini ngadto kang Gica.
Gawas pa, ang mga tawo nga nipili niya pagka-bise mayor, mao man usab ang susamang mga konstituente nga nibotar
niya pagka-mayor sa piniliay niadtong May 9, 2016.
Gihimug-atan ni Justice Yap nga base sa Aguinaldo doctrine, dili mahimong administratively accountable si Gica sa giingong “misconduct” nga nahimo diha siya usa pa ka bise mayor.
Human gimando sa Ombudsman ang iyang dismissal gituman niini si Gica ug mikanaog sa pwesto gani nipuli man kaniya pagka-mayor ang bise mayor nga si Reneiro Asentista.
Sa iyang Facebook account, gipadayag ni Mayor Gica nga gimingaw siya sa iyang mga konstituente sa Dumanjug ug nagpasalamat usab siya kanila tungod sa ilang pag-ampo ug padayon nga pag-suporta.