Drayber sa napiyapi nga multicab namatay

Napisat ang negosyante diha sa iyang multicab human gidaro ug nalatayan sa naghaguros na Ceres bus sa miaging adlaw samtang nagsubay sa National road sa Barangay Ginsay, dakbayan sa Danao.

Ang biktima nga naila nga si Judy Impas, 46, taga Brgy Kalumbuyan, Lungsod sa Sogod.

Si PO2 Joseph Aledon, traffic police investigator sa Danao City nagkanayon sa dihang nahinabi sa Superbalita Cebu nga ang biktima sakay sa iyang gipanag-iya nga multicab nga nagdala sa plate number YKS-483 padulong sa amihanang bahin sa Sugbo.

Nagsunod ang biktima sa usa ka wing van nga adunay plate number RKN-210 nga gimaneho ni Albino Bayron, Jr. 36, minyo nga taga Brgy. Masaba dakbayan sa Danao.

Pag-abot sa nahisgutang dapit mihunong ang wing van kay moliko sa eskinita aron nga moparada sa ilang buhatan, hinungdan nga ni-menor sa pagpadagan ang multicab nga gimaneho ni Impas.

Samtang naghaguros sa pagpadagan ang Ceres Bus CEH284 nga gimaneho ni Archie Mondejar, 38, minyo nga taga Taytay lungsod sa Daanbantayan nga giingong mikawat sa pikas lane nga mi-overatke sa laing sakyanan.

Apan kalit sab nga dunay gikasugat ang maong bus hinungdan nga mibalik siya lane ug didto iyang nadaro ang multicab nga gisakyan sa biktima.

Tungod sa kakusog sa impact na-sandwich ang driver diha sud sa iyang sakyanan sa dihang nipilit kini sa likod sa

wing van nga diha sa atubangan sa maong multicab.

“Murag nabibingka ang gisakyan sa biktima pwerting pagkapisata nalatayan pa sa Ceres Bus,” dugang ni PO2 Aledon.

Nadala pa ang biktima sa hospital apan kagahapon sa buntag mipahibalo ang mga kabanay nga nakabsan sa kinabuhi si Impas.

Giandam pa sa kapulisan ang tukmang kaso nga ipasaka sa kabanay sa biktima batok sa driver nga gitangong sa Danao Police station.