Andam mo-slide

Nipahibawo si kanhi mayor Michael Rama nga bukas na siya sa pagdagan sa pagka bise mayor o kongresista sa south district. Sa iyang pagpahibawo sa iyang bag-ong baruganan sa usa ka press conference kagahapon, naa si Bise Mayor Edgardo Labella nitambong. Sa ato pa, duna na silay gisabutang pamaagi kon unsay buhaton sa pagdeterminar kinsa ang angay nga modagan pagkamayor kanilang duha.

Sa nanglabay nga mga buwan, si Rama nagsige og insister nga siya modagan pagkamayor sa 2019. Apan ang Barug Team Rama members nga nagpasakop usab sa PDP-Laban, naghisgot na nga si Labella ang modagan pagkamayor, hinungdan nga dunay kalibog.

Sa miaging semana, nipadayag si Rama sa iyang kasagmuyo nga wa siya konsultaha sa pagsibog ni Tisa Barangay Kapitan Philip Zafra sa pagkandidato sa Association of Barangay Councils (ABC) sa Cebu City bisan kon siya pa ang nangu sa ilang partido.

Kon wa pa mousab sa iyang baruganan ni Rama, seguradong padung sa pagkabuak ang Barug Team Rama sa umaabot nga eleksyon nga posible nga mosangko sa panag-atbang sa kanhi manag-runningmate.

Nabalaka ang kaubanan ni Rama nga kon siya ang modagan sa pagkamayor, maglisod sila sa pagdaug tungod sa pagkamansa sa ngan niya nga giduhig ni Presidente Rodrigo Duterte sa illegal drugs.

Hangtod karon, wa gibakwi ni Duterte ang iyang paglambigit kang Rama sa illegal drugs bisan sa pipila ka mga higayon nilang panagkita. Wa pay ebidensya nga ang kanhi mayor tinud-anay nga nalambigit.

Gikinahanglan nga sila si Rama ug Labella maghiusa kay ligon si Mayor Tomas Osmeña. Napilde pa gani si Rama nga siya pa ang naa sa poder, unsa na kaha karon nga giparot na siya?

Sumala pa sa ginaingon “ang balay nga nabahin batok sa iyang kaugalingon di makabarog.”