‘Criminal City’
Mismo ang “kanhi laos nga pulitiko” nga maoy amahan ning dakbayan ang mipadayag na sa iyang kabalaka nunot niining sunod-sunod nga pagpamatay nga nahitabo ning dakbayan. Gani iya naman nga gitawag ang Cebu City nga “criminal city” ug dili na Queen City of the South. Makapa-alarma na tuod kining mga mga krimen nga nahitabo dinhi sa ato gumikan kay dili na kita luwas ug daw wala nay bili ang kinabuhi sa tawo. Sayon ra kutloon ug ang naka-porke ra ba kay walay kasulbaran.
Nagduda na ang “kanhi laos nga pulitiko” nga adunay kalambigitan ang mga pulis ning sunod-sunod nga mga patay dinhi sa dakbayan labi pa kadtong mga pagpamatay nga adunay kalambigitan sa illegal nga drugas. Kini human sa nabulilyaso nga pag-ambush unta ni kanhi Tejero barangay captain Jessielou “Jingjing” Cadungog diin ilang na-unhan ang mamumuno. Nasuta nga usa diay ka pulis nga nailhan nga si PO3 Eugene Calumba, ang ilang gidudahan nga mamumuno.
Adunay laing version ang kapulisan. Gi-insister sa mga kadagkuan sa kapulisan nga si PO3 Calumba ang biktima ug dili maoy mamumuno. Pasakaan og kaso sa kapulisan si Cadungog ug ang iyang driver-bodyguard nga si William Macaslang gumikan sa kamatayon ni Calumba. Ambot og unsay tinud-anay nga estorya niini.
Karon nabalaka na ang “kanhi laos nga pulitiko” sa mga krimen nga nahitabo dinhi sa atong kaugalingong tugkaran. Pero niadtong pag-uso sa vigilantes sa 2000, wala siya mabalaka nga sunod-sunod man usab ang mga pagpamatay niadtong maong mga tuig. Wala siya mabalaka niadto kay siya man ang nagpaluyo niadto. Apan karon nabalaka na siya kay laing grupo naman ang mihimo sa mga pagpamatay.
Okey, kay aminado naman siya nga mi-grabe na ang krimen nga nahitabo dinhi sa atong dakbayan, unsa man ang iyang mahimo isip amahan sa dakbayan? Usa sa mga iyang mga campaign promises mao ang pagpatunhay sa kahapsay og kalinaw ning siyudad. Kon pulis man ang nagpaluyo sa mga pagpamatay, nganong dili man kini niya mabadlong ug mapakgang? Anaa sa iyang mga kamot ang pagprotihir sa mga Sugboanon batok sa mga kriminal.