TAMBAGI KO, NOY KULAS

Dear Noy Kulas,

Ako si Menie, 18 years old ug nagtungha sa college diri sa Cebu. Naa ko magpuyo sa balay sa akong maguwang nga babaye aron ko makadaginot sa gasto kay di rich ang akong parents.

Noy Kulas, akong problema mao ang akong brother-in-law nga akong nasakpan a few times na nga mamuso nako. Wa unta ko magduda nga siya ang namuso nako few times pero ka usa ako siyang nasakpan nagtan-aw og porno unya naghikaphikap sa iyaha.

Nagduda ko niya kay naay time akong nakit-an ang akong underwear nga diha sa ilang kwarto. Ang akong ate wa makahibawo nganong naabot ang akong underwear sa ilang room. Nahadlok na ko unsay mahitabo nako kay usahay kami rang duha mahabilin sa balay kon mag out-of-town si Ate.

Mahadlok ko mosulti kang Ate kay basin maka-create ko og trouble sa among family. Maayo kaha mobalhin ko og puyo? Pero basin ba mahibung ug malain si Ate kon ako ning buhaton. Naglibog na ko, Noy, unsaon nako ang akong situation karon. Magpatambag na ko nimo.

MENIE Men,

Mahimo ra nga mobalhin ka sa pagpuyo. Pangita lang og rason, sama sa comfortability sa imong biyahe or pag-adto sa eskwelahan. O kaha maikog na ka nga mopuyo sa balay sa imong maguwang. Tinuod, di maayo nga mopuyo ka uban kanila diha kay basin mosuol ang utok, mahitabo na hinuon ang imong gikahadlukan.

Ang imong nakita di maayo nga tilimad-on kay kon basehan ang imong gisulti, ingon sa dunay perversion sa pangutok sa imong bayaw. Nga kon imo siyang hatagan og kahigayunan nga makahilabot nimo, iya kining buhaton. Naa man guy mga tawo nga perverted na ang panan-aw nila sa sex. Busa, mas maayong likayan. Naa ra bay daghang mga kaso diin ang mga suspek sakop ra usab sa pamilya. Unya kon imong tan-awon, di baya ka blood related nila. Basin unsa pay moabot sa iyahang utok.

Balhin na lang. Hangyoa ang imong parents.

NOY KULAS