Take me in your mind
Nakaila ko kang Dave kay klasmet ko siya sa kursong Accountancy, third year na mi. Samtang sila si Renren ug Gabriel schoolmate nako. Nagkaila ming upat usa ka higayon nga nagkatapad mi sa library kay duna mi gi-research sa tagsa-tagsa namo ka school assignment.
Nakahibawo ko nga bisag boyfriend na ni Renren si Gabriel nagsige gihapog pangulitawo si Dave kang Renren. Kon buot gyud sabton, si Dave ang third party sa panagbuwag nila ni Gabriel ug Renren. Apan wa isipa ni Renren nga third party si Dave kay sa dihang nakigbuwag siya kang Gabriel wa pa man niya sugta si Dave.
“So, duna gyuy third party, Ren, sa pagpakigbuwag mo kang Gabriel?” Gusto kong klaruhon kon unsa gyuy ikasulti ni Renren aning sitwasyona.
“Para nako, Roselle, ang third party gikarelasyon na una nagkabuwag ang duha ka managhigugmaay. As I’ve said, di third party si Dave sa among pagbuwag ni Gabriel. You know, pagbuwag ko kang Gabriel, wa koy plano nga sugton si Dave. Pero miabot sa punto nga nasuta ko sa akong kaugalingon nga love ko sab diay siya. That’t why nga gisugot ko siya karon lang bag-o.”
“Well, ikaw ang mo-say sa final nga desisyon, Ren. Ikaw ang nakahibawo sa pinitiik sa imong kasingkasing. As your friend, gisabot tika anang bahina.”
Friend man gud kaayo mi si Renren. Sa eskol tuod mi nagkaila apan dali ra ming nagkasuod kay prehas ming madasigon nga pagka babaye. Duna mi mga jokes nga makapakatawa gyud namo. Di green jokes. Kanang mga pakatawa nga simple lang tuod apan mahikatawa gyud ang tawo.
“Salamat, Rose.” “Gusto ba nimo nga sultihan ko si Gabriel ani, Ren?”
“Aw, kon makaayo kini niya aron maka-move-on dayon siya, sige. tug-ani siya.”
Naghunahuna ko. Makaayo ba kaha kang Gabriel, no, kon makahibawo siya nga gisugot na ni Renren si Dave? Apan kinahanglang madawat gyud ni Gabriel nga way love si Renren niya. Nakadesisyon ko nga tug-anan si Gabriel sa sitwasyon ron sa lovelife ni Renren.
“Kining, Rose, how about you?”
“H-Ha? Unsa gud nang pangutanaha, Ren?”
Nakalitan gyud ko. Wa ko makasabot kon unsay buot ipasabot ni Renren sa iyang pangutana nako. (SUMPAYAN)