Australia dili na moapelar

Gianunsyo sa Basketball Australia nga dili na kini moapelar sa silot nga gipahamtang sa FIBA human sa nahitabong karambola tali sa Australia Boomers ug Gilas Pilipinas niadtong Hulyo 2 sa World Cup Asian qualifier sa Philippine Arena.

Tulo ka mga magduduwa sa Boomers nga nahilambigit sa kasamok ang gipangsuspenso sa FIBA ug kini mao sila si Chris Goulding (1 game), Thon Maker (3 games) ug Daniel Kickert (5 games).

Ang Basketball Australia gipamulta sab og 100,000 Swiss francs gumikan sa “unsportsmanlike behavior” ug sa pagtangtang niini sa decals sa korte sa Philippine Arena atol sa ilang praktis.

“Our legal advice examined a range of appeal options,” pamahayag ni Basketball Australia chief executive Anthony Moore nga napatik sa Spin.ph.

“However, the chances of success under the FIBA appeal process are very low. We have decided to pursue these matters with FIBA independent of the appeal process.”

Ang Basketball Australia miingon nga ang nahitabo ilaha na lang hunahunaon nga usa ka leksyon nga puwedeng kapanaminan sa ugma damlag.

Sa habig sa Gilas, 10 ka mga magduduwa ang nangasuspenso lakip na si coach Chot Reyes ug assistant coach Jong Uichico.

Si Reyes gipamulta sab og 10,000 Swiss francs samtang ang Samahang Basketbol ng Pilipinas (SBP) gipabayad og 250,000 Swiss francs.

Usa kini sa nakahatag og dakong problema sa Philippine basketball gumikan kay naglisod na kini pagpangita og mga magduduwa nga ihulip sa mga nangasuspenso.

Miabot sa punto nga nakadesisyon ang SBP nga iatras ang partisipasyon sa nasod sa basketball event sa umaabot nga Asian Games.