BUGNAW ANG HINAGDANAN CAVE

Gusto ka bang molangyaw ug mangitag lugar nga mamahimo nimong kapalabyan sa imong oras samtang maglangoylangoy sa bugnaw nga tubig gikan sa kinaiyahan?

Kon ikaw mosuroy sa lalawigan sa Bohol, gawas sa nabantog nga Chocolate Hills sa lungsod sa Carmen, ang Tarsier sa lungsod sa Loboc ayaw usab kalimot sa pag-adto sa Hinagdanan Cave.

Ang kweba, nahimutang sa Barangay Bingag, lungsod sa Dauis , Bohol.

Gawas sa maanindot nga lapyahan sa Panglao Island, ang Hinagdanan cave maoy labing kinaham sa mga bisita gumikan sa iyang talagsaon nga kaanyag.

Imong makita ang lainlaing porma sa bato ug anaa usab ang gitawag og stalactites ug

stalagmites nga nagpalibot sa daw lawa diin mahimo nga kaligoan pinaagi sa paglangoy.

Kon gikan ka sa Cebu City, ang labing duol nga rota mao ang pagsakay og fastcraft gikan sa Pier 1 paingon sa dakbayan sa Tagbilaran dayon mahimong mosakay ka og tricycle ug ubang de pasaheroan.

Pag-andam lang og tag P50 matag bisita isip entrance fee diin ikaw sugaton sa mapahiyumon nga empleyado sa ilang tourism office.

Kon grupo o daghan ang inyong kauban ug pulos first timer, adunay mga local guide nga maoy mouban paingon sa baba sa kweba diin gihimo nga sayon sa lungsod pinaagi sa pagbutang og concrete nga hagdan.

Bisan kon ikaw gisingot, apan inig abot sa sud maghinayhinay kini og kauga sanglit daw suyopon sa bugnaw nga temperatura (depende sa panahon ang gibugnawon).

Inig abot nimo sa baba sa kweba, mas maayo nga mopirat sa makadaghan ang imong mga mata aron dali maka-adjust sa ngiob apan di na kaayo problema sanglit gibu-

tangan na kini og suga.

Aduna say duha ka lungag ang langob diin mosud ang normal nga hayag sa adlaw apan di kuyaw sanglit gitaptapan kini og net.

Apan mas malingaw ang mga turista sanglit gawas nga makapakuha silag hulagway, makaligo ug maka-dive sila sa tubig.

Ang linaw ilawon sa Hinagdanan cave moabot ngadto sa 15 ka tiil ang giladmon panahon sa high tide.

Matod sa mga guide nga di mahubsan ang linaw bisan pa sa kusog nga huwaw sanglit adunay dako nga tubod ug panahon sa taob, ang tubig sa dagat motipon sa tab-ang sanglit di kini layo sa dagat. Base sa record sa tourism

office, moabot sa 300 ka mga local ug langyaw nga turista ang moadto matag adlaw aro himamaton ang atraksyon sa barangay Bingag.

Ug kon matagbaw na sa pagsawomsawom sa bugnaw nga tubig, mahimo usab nga mosuroy sa laing lugar sa Bohol labi na didto sa ilang gitawag og

man-made forest nga natung-an sa lungsod sa Bilar ug Loboc.

Didto makita ang mga dagko nga kahoy diin naglagbas ang ilang national road paingon ngadto sa lungsod sa Carmen. /