Naa sa drug watchlist si Cadungog?
Nagka-alegre kining kaso tali ni Tejero barangay councilor Jessielou Cadungog batok sa kapulisan. Nag-iyahay na lang og kiha. Ang kapulisan mipasaka og kasong murder ug frustrated murder batok ni Cadungog ug sa iyang driver-bodyguard nga si William Macaslang. Mi-insister ang kapulisan nga didto sulod sa sakyanan ang konsihal sa dihang gipusil si PO3 Eugene Calumba ug driver sa motorsiklo nga si Michael Banua. Negatibo si Cadungog sa gun powder. So, posible wala makapabuto. Armas gihapon ni Cadungog ang gigamit ni Macaslang.
Ang National Bureau of Investigation (NBI 7) diin maoy mikustudiya nila ni Cadungog ug Macaslang, mipasaka usab og kasong homicide batok ni Macaslang nunot sa pag-angkon nga siya maoy nakapusil kang Calumba. Wala maapil si Cadungog sa kiha sa taga NBI kay mituo siguro sila sa version sa konsihal nga wa siya atol sa hitabo.
Wala kita didto busa dili kita maka-conclude kon kinsang version ang atong tuhuan. Ang kapulisan adunay saksi batok kang Cadungog nga didto siya sulod sa sakyanan. Si Banua lain na sab og estorya, pabor sa kapulisan. Pero sa dihang ako siyang nahinabi sa akong tulumanon sa dySS pinaagi kang Konsehal Dave Tumalak, siya nagkanayon nga gimanduan siya ni Calumba nga paspasan ang pagpadagan sa motorsiklo, ilang i-overtake o sabayan ang sakyanan ni Cadungog. Unsay rason? Aduna silay motibo?
Apan abtik nga nakapusil si Macaslang, iyang na-unhan si Calumba nga matod pa nisuway usab og lanit sa iyang pistola. Kon ang kapulisan maoy pa-estoryahon nag-surveillance si Calumba, di mamumuno sukwahi sa pangangkon ni Cadungog. Ang “kanhi laos nga pulitiko” nga kaalyado ni Cadungog todo depensa sa konsihal.
Karon mas mi-grabe ang akusasyon batok ni Cadungog kay gibulgar sa kapulisan nga anaa siya sa drug watchlist ug ipa-revoke ang lisensiya sa iyang mga armas. Aduna siyay 13 ka mga armas sa nagkalain-laing kalibre. Puwerting daghana pod na uy. Gumikan kay anaa na sa drug watchlist si Cadungog, mosamot nga namiligro ang iyang kinabuhi karon. Pero nganong karon pa man ni gibulgar?
(bobbygnalzaro@gmail.com)