LOLO, 84, GITIGBAS SA UYAB, 54

Naangol ang 84 anyos nga lolo sa Purok 7, Barangay Daang Lungsod, siyudad sa Toledo human tigbasa sa iyang 54 anyos nga uyab pasado alas 6 sa gabii niadtong Biyernes.

Ang biktima nga nakaangkon og samad tinigbasan sa lawas mao si Wilfredo Secretaria, 84, biyudo.

Sa imbestigasyon ni SPO1 Bartomiano Gargar sa Toledo Police Station, nasuko si Secretaria nga wala mosanong ang iyang uyab nga si Maria Garing Del Rosario, 54, buwag sa bana, sa dihang giimbitar niya sa usa ka hikay sa ilang balay.

Tungod niini, iyang giadto ang balay sa iyang uyab aron magpakisayod.

Pag-abot ni Secretaria sa balay ni del Rosario, naglalis ang duha ug iya ning nadapatan ang ginang hinungdan nga nikuhag sundang ang suspek.

Tungod sa kalagot sa ginang, gitigbas niya ang 84 anyos gamit ang sundang sa makadaghan.

Naatol usab nga naa ang manghod ni del Rosario nga si Nestor Garing nga nakakita sa panag-away sa duha, nikuha usab nig kahoy ug gibunal-bunalan si Secretaria. “Murag naay misunderstan

ding sa duha ba kay gi-invite lagi kuno ning babaye nga moadto sa hikay sa ilang Wilfredo unya wala man moadto. Mao tong nasuko ning biktima kay basin unsay naa sa hunahuna aning lolo, basin nanga bubho pud,” matod ni Gargar nga nahinabi sa dyHP.

Mitahan usab dayon si del Rosario samtang gidala sa tambalanan sa Toledo si Secretaria.

Si Secretaria dunay mga samad tinigbasan sa ulo, ngabil, liog ug tuo nga nawong dihang gidala sa Toledo City General Hospital.

Ang mga kabanay ni Garing nitambag nga buwagan na lang ni del Rosario si Secretaria tungod kay daling masuko apan hangtod ning pagsuwat wala pa kini mohukom, dugang ni Gargar.

Giingong dili na mopasakag kaso si Secretaria tungod sa iyang dakong gugma kang del Rosario. / AYB, Maria Jenesis Empasis, CIT-U Intern