60 KA BALAY SA KAMPUTHAW NAUGDAW

P900T DANYOS; DALAN HAGIP-OT: BOMBERO

■KAY LISOD. Wa makapaduol og maayo sa mga balay nga nangasunog kining usa ka bombero tungod sa kalisod sa agianan sa sityo Lower Kamputhaw, Dakbayan sa Sugbo kagahapon sa hapon. Hayan, nagkinahanglan na og re-blocking ang dapit. Estorya sa pahina 2. /

Dul-an P1 milyon ang danyos sa sunog nga nahitabo sa Purok 3 Lower, Barangay Kamputhaw, dakbayan sa Sugbo kagahapon sa hapon diin niabot usab sa 60 ka mga balay ang nasunog.

Giisip nga usa sa labing dako nga sitio sa Barangay Kamputhaw ang nasunogan kagahapon sa hapon.

Nilungtad og kapin usa ka oras ug niabot sa 3rd alarm ang sunog diin nadawat sa kabomberohan ang alarma alas 3:50 sa hapon.

Gisaka kini sa 3rd alarm alas 4:05PM ug nakontrolar alas 5:12PM.

Nasayran nga gikan sa 2nd floor nga gipuy-an ni Roxanne Limbaga ang kayo.

Gipanag-iya sa usa ka Emma Limbaga Kwan ang maong balay.

Matod ni Cebu City Fire Marshal Chief Inspector Noel Nelson Ababon nga usa ning kahagip-ot sa lugar nga naglisod sila og pawong dayon sa kayo.

Nasayran nga way sakyanan nga makasulod sa fire scene ug tawo lang ang mamahimong makaagi niini.

Sa pagkutlo ning balita, wala pa masuta ang rason sa maong sunog ug anaa sa P900,000 ang danyos niini.

Dugang ni Ababon nga ila nang gisugat ang kayo aron di na kini makalabang pa sa ubang sitio ingon man makaapekto pa og laing balay.

Matod ni Mark Anthony Casicas, kinsa executive officer sa Barangay Kamputhaw, nga usa ning Purok 3 Lower sa labing dako sa maong barangay ingon man mao usab kini ang daghan og tawo kay daghang nagpuyo.

Tungod usab kay kadaghanan light materials ang mga balay nga nasunogan, dali kining nakakatag.

Dugang ni Ababon nga tanang unit sa fire station sa dakbayan sa Sugbo niresponde lakip ang Mandaue ug Talisay Filipino Chinese Volunteer Fire Brigade diin gibana-bana nga anaa sa 2030 ka fire truck ang nitabang pagpawong sa kayo.

Aron masiguro usab ang pagkontrolar sa tawo, nagpadala ang matag estasyon sa Cebu City Police Office og tag duha ka personnel aron dili maghuot ang mga tawo ingon man maagian gihapon sa fire truck. /