Tinud-a og imbestigar

Gikan niadtong Hulyo 2 ngadto sa Agusto 2, labing minos 24 na ka mga tawo ang gipamatay dinhi sa Metro Cebu. Way bisan usa sa mao nga mga kaso ang nasulbad. Bisan gani pagtumbok og suspek, walay nahimo ang kapulisan. Mao tingali nga nakaingon si Cebu City Mayor Tomas Osmeña nga pulis ra ang nagpaluyo niining mga pagpamatay kay way bisan usa ka suspek nga nadakpan sa kapulisan. Kutob ra sa “persons of interest,” way napusasan. Bisan ang tinud-anay nga motibo, way natumbok.

Kon magpadayon kining mga patay nga way kasulbaran kay ang tanan pulos gihigot sa drugas, anam-nam nga makuhaan ang pagsalig sa publiko sa kapulisan sa ngadto ngadto.

Maghatag usab kini og kaisog sa mga sindikato sa pagpatay niadtong mga naghulga kanila, lakip na sa kapulisan ug ubang law enforcement agencies. Inay magbaton sila og kahadlok, madasig na hinuon sila kay way nahimo ang mga awtoridad. Magtuo silang bulay-og ang mga pulis sa pag-imbestigar.

Sa madugay o sa madali, ang paggamit sa linya nga durugista ang gipatay di na mosalir ug matibhangan og dako ang pagsalig sa katawhan labina kon magsaka na ang gidaghanon sa mga tawo nga mangamatay kay napagan lang.

Bisan unsaon ra ba, kon ang pagsalig matibhangan, lisod na kini mahiuli sama sa bildo nga nabuak.

Aron mawagtang ang pagduda, kinahanglan tinud-on sa kapulisan ang pagsulbad ning mao nga mga kaso, labina niadtong gipangdudahang nangalambigit sa drug syndicates.

Kay pinaagi sa pagsulbad, mapakita ngadto niini sa katawhan nga di diay sila bulay-og. Ikaduha, masaligan diay ang kapulisan, kansang tahas mao ang “pag-alagad ug pagpanalipod” sa katawhan.

Ang ilang gibuhat sa kaso ni PO3 Eugene Calumba, diin dali ra nilang gibasol si konsehal Jessilou Cadungog sa hitabo, mas nakadaut kay sa nakaayo sa ilang imahe.