Charge to experience na lang Kap. Nina

Matod pa ni Mabolo barangay captain Niña Mabatid nga iyang gisumbong sa Malacañang ang nahitabong eleksiyon sa Association of Barangay Councils (ABC) diin siya ug ang iyang gropo mi-boycott. Mi-walk out ang grupo ni Mabatid human sa presensiya sa ‘kanhi laos nga pulitiko’ didto sa venue sa eleksiyon nga maoy naka-inpluwensiya sa mga kapitan nga mobutar sa iyang kaatbang nga si Kasambagan barangay captain Franklyn Ong.

Nakadaog si Ong sa maong eleksiyon pinaagi sa 51 boto samtang zero si Mabatid gumikan sa ilang gihimo nga walk-out. Matod pa ni Mabatid nga ang presensiya maoy naka-pressure sa mga kapitan sa Bando Osmena Pundok Kauswagan (BOPK) nga mobutar ni Ong gumikan sa kahadlok. Nangangkon si Mabatid nga daghan unta sa mga BOPK barangay captains ang misekreto kaniya nga musoporta unta apan nahadlok lang gumikan sa hulga nga sila hukasan sa ilang mga mihuras.

Mao lagi nay akong gi-ingon, kinsa bay nag-ingon nga non-partisan ang barangay election. Kon non-partisan, nganong nag-apil-apil man ang mga pulitiko sama aning ‘kanhi laos nga pulitiko’? Importante ang ABC election ug ang kadaugan sa ABC candidate kay molingkod man sa pagkakonsihal. Sikit ang mga membro sa oposisyon ug sa administrasyon sa konseho. Kon majority ang administrasyon, matuman ang mga personal ug legislative agenda sa tawo nga nagtungkawo karon diha City Hall.

Misumbong si Niña sa Malacanang? Unsa man kaha usab ang mahimo sa Malacanang? Maka-usab kaha ang Malacanang sa resulta sa eleksiyon? Imposible na nga makapa-usab sa eleksiyon. Kon mi-interbiner pa ang Malacanang sa ABC elections, hayag na unta ang kadaugan ni Niña. Siyaro og dili ma-pressure o matuwerka ang mga kapitan nga mosuporta ni Niña. Kinsa may ilang sundon, ang mayor o presidente?

Kon akoy Niña, ako na lang dawaton ang resulta. Dili pa iyang panahon karon kay gumikan ba kaha kay bag-o pa siya. Basin sa sunod nga eleksiyon, dako na siyag tsansa. Wederweder man ning pulitika ba.