Asa na ang CCTV?

Lain-laing mga kaso ang gipangsang-at the NBI ug kapulisan. Nagsinukli-ay na og mga pulong ang lain-laing mga kadagkuan sa kagamhanan ug sakop sa media.

Apan nahibulong lang gyud ko nganong hangtod karon, wa pa may niguwa nga CCTV footage sa nahitabong pinusilay diin namatay ang usa ka pulis nga si PO3 Eugene Calumba sa Barangay Tejero.

Duna koy kaila nga nakadugog daw sa nakakita diha sa kapuisan nga makita gyud sa CCTV nga kuyog si Kap Jessielo Cadungog sa puwa nga Cruiser nga nalambigit sa giingong insidente.

Murder gyud daw ang nahitabo. Apan sa laing bahin, moinsister ang laing kaila nga taga Tejero nga nisuway gyud sa pagbira ang maong pulis apan mas abtik ang drayber ni Cadungog.

Mga kaila sa OPASCOR niingon sab nga naay CCTV footage nga naa ra si Cadungog sa ilang building dihang nahitabo ang pinusilay.

Alang kanako, ato lang matino kon unsay tinuod kon moguwa na ang CCTV footage sa maong hitabo.

Nahibulong lang ko nga abtik man unta kaayo ang atong mga sakop sa media kabahin sa pag-access sa mga CCTV footage. Apan murag wala sila makakuha karon.

Gawas nga matino ang tinuod nga nahitabo, nindot unta gyud kon atong matandi sab ang hulagway sa suspek niining hitabo sa Tejero ug kadtong mga miaging assassination sama sa pagbanhig ni PDEA agent Earl Rallos ug Atty. John Ungab.

Sa pagkakaron, nabalita nga si Pearl Ungab, ang asawa sa gibanhigan nga atorni, niadto sa buhatan sa National Bureau of Investigation (NBI) ug nangita og kopya sa CCTV sa nahitabo sa Tejero. Kahinumdoman, niguwa man sa CCTV kadtong pagbanhig sa iyang bana ug ang lookout.

Dunay posibilidad nga lahi ra ang mga killer. Apan kon mopareha? Hala, kadako sa istorya!

ABC

Ato diayng ipaabot kang Kap Franklyn Ong ang atong congratulations sa iyang kadaugan isip presidente sa Association of Barangay Councils (ABC) sa Syudad sa Sugbo.

Tungod niini, klaro na ang mayoriya sa BOPK diha sa Konseho ug kutob na lang sa pagsabasaba ang mahimo sa oposisyon. Palpak ang ilang maniubra nga mahimong konsehal si Erik Espina. Unsa pa may gamit niini karon nga minoridad man gihapon sila.

Hinuon, naa pa man silay pabuhi sa dugo nga daw masuspenso si Mayor Osmeña tungod sa maniobra sa Office of the Presidential Assistant for Visayas (OPAV).

Ang wala gisulti sa oposisyon sa Syudad sa Sugbo kay nibali na ang politikanhong hangin sa ibabaw. Murag Avengers nga nailogan ni Thanos ug mga jewel ang mga nasudnong lider sa PDP-Laban.(@anol_cebu sa Twitter)

In the first place, the 93-1, there was unanimous consent from our group authorizing him because we believe it’s long overdue,”

- matod ni Cebu City Vice Mayor Edgardo Labella sa pangangkon ni Mayor Tomas Osmeña nga siya ra ang naninguha nga madayon ang land swap deal sa 93-1.