Yam ug Yen magpainit matag gabii sa ‘Halik’

Sa kanta pa lang sa Aegis nga maoy themesong sa bag-ong teleserye sa Dos morag ma-engganyo ka na nga nuntan ni matag gabii sa primetime bida.

Makita dinhi nga magtigi sa aktingan ang Yam Concepcion ug ang paborito sa Dos kay dili gyud kini mawagtangan og proyekto ang Yen Santos.

Pero dili lang siguro sa aktingan mobida dinhi ang duha kondili sa paseksihay pod ug pagka-daring.

Way kwestyon kang Yam nga unang nailhan sa pagpaseksi apan si Yen andam na ba usab kaha sa mga init nilang mga eksena?

Morag andam na ang duha kay sa mga interbyu nila way lipod-lipod nilang gitubag kon kinsa ang maayong mohalok sa duha nila ka leadingman.

Siguro naman pod dili na ka mag-inarte pa ug magpakyeme kon ang maka-eksena nimo dinhi silang Sam Milby ug Jericho Rosales.

Sa seryeng “Halik” nga maoy mohulip sa naghinapos nga “Since I found You” nilang Piolo Pascual ug Arci Muñoz, silang Sam, Jericho, Yen ug Yam na usab ang atong nuntan matag gabii.

Sa trailer pa lang daghang komprontasi nga mahitabo ug may mga sinagpaay pang eksena nga nakaseguro kong atangan gyud matag gabii gawas pa’s nagdilaab nilang mga eksena.

Mao kini ang seryeng may titulo niadto nga “Love Will Lead You Back” ug “Halik Mo” ug karon “Halik” na nga atong makita karong Agosto 13 sa Dos.

Naa usab dinhi silang Amy Austria, Precious Lara Quigaman, Romnick Sarmienta, Cris Villanueva, Christian Bables, Hero Angeles, Almira Mulach, Allan Paule, Jane de Leon, Gabe Lagman, JC Alcantara, Chai Fonacier, Tart Carlos, Crispin Pineda ug sa espesyal nga partisipasyon ni Louise Abuel isip batang Jericho ug Veyda Inoval ang batang Yen.

Istorya ni sa mga batang Echo ug Yen sa ilang panaghigugmaay apan sa pagdako na nila lahi ang ilang makadayon sa usag-usa.

Kon unsang pagkahitaboa ug kon makabalik ba sila mao kanay atong nuntan sa seryeng “Halik”, ay’g saba!

Gikalipay og maayo sa “Mayward” ang kapamilya loveteam nga Maymay Entrata ug Edward Barber kay bida na sila sa bagong teleserye nga “Honey, My Love So Sweet”.

Gikonpirmar kini sa Dreamscape Entertainment head nga si Deo Endrinal, malipayon ang duha kay bida sab sila karon sa “Wansapanatym” sa episode nga “Ikaw ang Ghost-to ko”, ay’g saba!