Gugma sa Aguinid

Nakahuman na sa kolehiyo si Arnold sa kursong civil engineering, apan wala siyay plano nga motrabaho. Mas gusto niyang magpabilin sa ilang lungsod sa Samboan kay malingaw siya uban sa iyang mga barkada. Kanunay magyawyaw ang iyang inahan nga si Juliet kay naglagot kaniya nga dili mangita og trabaho. “Pirme lang ka nagsalig sa imong ginikanan!” reklamo ni Juliet. “Ma, batan-on pa ko. Ayaw kabalaka, motrabaho ra unya ko!” ni Arnold

Usa ka higayon giagda si Arnold sa iyang kabarkada nga si James nga mo-aplay sila isip tour guide sa Aguinid Falls. Gidawat sila kay kulang ang mga tour guide gumikan sa nagkadaghang turista nga mobisita human nainila ang Aguinid Falls. Nalipay si Arnold nga mipahibalo sa iyang inahan nga may trabaho na siya. Misamot hinuon ang kasuko niini kay dili haom sa kursong iyang nahuman.

Adlaw nga Sabado may mga turista nga nangabot. Miduol si Arnold ug nagpaila nga tour guide. “Ako si Mona. Pwede ra dili mokuha og tour guide?” ni Mona. “Dili mahimo kay delikado. Dili sab ninyo kabisado ang lugar,” ni Arnold. Human magkasinabot gidala sila ni Arnold ngadto sa busay.

Samtang nagsaka na sa ikatulo nga lebel sa busay nadakin-as si Mona ug natumba. Gitabangan siya ni Arnold nga makabarog. “Salamat sa imong pagtabang!” ni Mona nga mipadayon pagsaka bisan naglisod. “Okey lang. Parte na sa akong trabaho,” ni Arnold nga mialalay sa dalaga. Tungod sa pagtabang ni Arnold kang Mona nagkasuod ang duruha.

Gikan sa Aguinid Falls gi-

hatagan si Arnold og contact number ni Mona samtang naghuwat sila og bus padulong sa Cebu City. Sukad niadto kanunay na silang mag-kontakay sa selpon.

Usa ka higayon mibalik si Mona sa Aguinid Falls nga nag-inusara. Gipangita niya si Arnold. Nangadto sila sa ikalima nga lebel sa busay. “Motuo kag love at first sight?” matod ni Arnold. “Siyempre. Your actions speak louder than words,” ni Mona nga misandig ni Arnold ug nag-selfie.

Dihay laing higayon nga wala magpahibalo si Mona nga mobalik sa Aguinid Falls aron pag-surprisa kang Arnold. Nahisagmuyo siya kay nakit-an niya kini nga may babayeng kauban ug giagbayan. Mibalik dayon siya sa Cebu City. Sa iyang bahin, nahibulong si Arnold nganong dili na makontak si Mona. Gi-block sab siya sa Facebook. Wala siya masayod nga nakit-an siya ni Mona nga may giagbayan nga babaye.

Usa ka gabii samtang nagtan-aw sa TV si Mona my ‘newsbreak’ nga migawas. Usa ka motorsiklo ang nabanggaan sa bus didto sa Samboan. Si Arnold nga nagmaneho sa motorsiklo namatay dihadiha. Wala siya makatuo sa nahitabo. Milarga siya paingon sa Sam- boan sa adlaw nga ilubong si Arnold aron mohatod sa katapusang higayon. Tungod sa trapik wala siya makaabot sa paglubong apan milahos siya sa sementeryo. “Goodbye, my love! Rest in peace!” tuaw ni Mona nga naghilak atubangan sa lubnganan ni Arnold.

Milabay ang duha ka tuig. Mibalik si Mona sa Aguinid Falls atol sa sumad nga nagkaila sila si Arnold aron handumon ang ilang kagahapon. Nag-inusara siya sa daplin nga naglingkod samtang nagsud-ong sa tubig nga miambak sa busay. May kamot nga mikupot sa iyang abaga. Milingi siya.

“Nganong dili na ka makontak?” nangutana si Arnold. “Dili ba patay ka na?” ni Mona nga nanlimbawot ang balhibo kay nagtuo nga gimultohan siya sa hinigugma.

“Ang akong kaluha nga nagpuyo sa Mandaue ang namatay,” tug-an ni Arnold.

“Nganong pareho inyong ngalan?” ni Mona nga naglibog.

“Pareho among ngalan, pero Ako Arnold II samtang siya Arnold III,” esplikar ni Arnold.

Mihilak si Mona ug migakos kang Arnold. Pasayloa ko. Nagtuo ko ikaw kadtong akong nakit-an kaniadto nga may kaagbay nga babaye,” ni Mona.

“Ikaw lang ang akong gimahal. Ang akong kaluha ang imong nakit-an kuyog sa iyang uyab nga namisita namo ni Mama dinhi,” ni Arnold nga migakos og hugot kang Mona. “Ang aksidente nahitabo dihang mibalik siya pagbisita kanamo nga nag-inusara sakay sa iyang motorsiklo.”

Nangadto sila sa katapusang lebel sa Aguinid Falls aron handumon ang adlaw nga sila nagkahimamat, kanus-a natawo ang ilang gugma.