GIDAWAT BISAN SA KASAYPANAN
Ang matuod nga gugma, bisan sa kasakit o kasaypanan, andam ka modawat sa tawo nga imong gimahal.
Wala kini magtan-aw sa kagahapon kondili nagtutok sa kaugmaon.
Sama kini sa sugilanon sa gugma sa magtiayong PO2 Ryan Christopher Morales, 30, ug Maria Luna Anga-Morales, 25.
Si Ryan niangkon nga nakahimo siya og kasaypanan kang Luna ug napasakitan sa pipila ka higayon.
Apan mas nipatigbabaw ang gugma ni Luna ug nadawat kon unsa man ang kasaypanan nga nabuhat sa lalake nga gipitik sa iyang kasingkasing ug gipili nga makauban sa tibuok niyang kinabuhi.
Sila unang nagkita sa usa ka haya sa namatay nga paryente sa tagsa-tagsa ka kabanay niadtong Hunyo 2009 sa Barangay Tabunok, siyudad sa Talisay.
Nadani ang atensyon ni Ryan sa nawong ni Luna nga iyang gihulagway nga daw anghel ang hitsura ug sige siya og tutok niini.
“Kon mauyab ni nako, swerteha gyud nako,” pamulong ni Ryan sa kaugalingon.
Ang iyang ig-agaw nga babaye nga si Monalou, suod nga higala ni Luna, maoy nipailaila nila.
Si Ryan ang unang ni-text ni Luna, apan ang dalaga niadtong higayona, wa dayon maka-reply, hinungdan nga pagkasunod adlaw, nanawag na ang ulitawo.
Ang duha nagkauyab niadtong Hulyo 6, 2009.
Sama sa ubang mga relasyon, nasuwayan usab ang gugma sa duha tungod kay dili uyon ang ilang isig ka pamilya sa pagsugod sa ilang relasyon.
Apan niabot ra usab ang panahon nga pulos na niuyon ang ilang mga pamilya.
Laing pagsuway nga ilang nasinati dihang nadawat na sa pagka pulis si Ryan ug sud sa unom ka buwan nga training sa Basic Recruit Course sa Philippine National Police (PNP) sa Barangay Gaas, lungsod sa Balamban, ug way komunikasyon ang duha.
Paambit ni Ryan, wa siya magdahom nga makapaabot si Luna niya human sa ilang training, kay ang ubang mga karelasyon o asawa sa iyang kaubang mga
trainee kay nagkabuwag. Apan niadtong 2012, nagkabuwag silang duha sud sa unom ka buwan ug niangkon si Ryan nga may nakarelasyon siyang laing mga babaye.
Apan bisan sa mga pagsuway, nibarog ang gugma sa duha ug gidawat ni Luna si Ryan. Ang duha nahiusa niadtong Hunyo 16, 2018 sa Sacred Heart Parish, dan Jakosalem, siyudad sa Sugbo.
"Gipili nako siya kay bisan sa tanang challenges and kasaypanan nako, nagpabiling lig-on ang iyang baruganan ug gidawat gihapon ko niya," dugang ni Ryan.
Nagbunga ang ilang gugma og usa ka batang lalake, si Godrick Ryllee, 2 anyos.