Panagtabla buakon
Kinsa kaha ang manuktok sa kampyonato karong gabii tali sa Barangay Ginebra Kings ug San Miguel Beermen atol sa ilang game 5 sa best-of-seven-series Commissioner’s Cup finals sa Philippine Basketball Association (PBA)?
Ang SMB ni coach Leo Austria gimasaker sa Gin Kings ni coach Tim Cone 130-100 sa game-four niadtong Biyernes sa gabii didto sa Smart Araneta Coliseum.
Sama sa naandan, nagmangtas na usab ang best import nga si Justin Brownlee human siya nipabuto og 37 puntos diin iyang napasulod ang 15 gikan sa 18 niya ka tira.
Nakadawat usab siya og igong suporta gikan sa Sugbuanong higante nga si Greg Slaughter kinsa nihipos og 19 puntos, 18 puntos ang giamot ni Joe Devance samtang 17 puntos ang gitampo ni LA Tenorio.
Sa kapildihan sa Beermen, igo lang nirehistro og 14 puntos ang ilang import nga si Renaldo Balkman diin si Arwind Santos ang nitimon sa ilang opensa pinaagi sa pagpakatap og 22 puntos.
Ang Best Player of the Conference nga si Junemar FajarNigamit do, nibuga og 15 puntos ug 14 ka rebounds diin sa unang 24 minutos, nalimitahan siya sa GinKings ngadto sa 4 puntos.
Si Balkman kinsa grabe ang pagkadismaya sa resulta sa game 4 nisaad nga mobawos ang Beermen sa pagsugod sa ilang duwa alas 6:30 karong gabii sa samang venue.
Ang Ginebra nigamit sa ilang labing impresibo nga duwa human ilang gikulit ang 17-0 sa first quarter ug sukad niadto, wala na molingi ang team ni Cone.
Grabe ka dimalas ang Beermen sanglit sila si Alex Cabagnot ug Chris Ross kinsa maoy responsabli sa ilang kadaugan sa game 2 ug 3, igo lang nagkumboya og 15 puntos diin igo lang sila nipasulod sa 5 ka itsa gikan sa 19 ka field goals.
Si Tenorio sa iyang bahin nagkanayon nga kon gustohon sa Kings nga modaog sa maong series, kinahanglan nga motampo ang iyang mga kauban ug dili magsalig ngadto kang Brownlee.
Ang coach sa Kings nagkanayon nga dili sila makasiguro nga modaog sa game 5 sanglit naglungotlungot na usab ang Beermen nga mobawos human nila gilubong og taga liog.