HARA NGA CEBUANA
Gilangkat sa Sugbuanong dalagita nga si Moira Frances Erediano ang bulawang medalya human siya nanghawod sa 2018 Alaska Ironkids Philippines kagahapon sa Shangri-La Mactan Resort & Spa sa Lapu-Lapu City.
Si Erediano nga miyembro sa Organique Acai Triathlon Team mihatag og dugang impresyon sa katawhan human nanghawud sa girl’s 13 to 14 division sa maong kompetisyon.
Ang tinun-an sa Grade 8 Sacred Heart Scgool-Ateneo de Cebu (SHS-AdC) naulahi pa sa paglangoy apan didto niya gibawi sa pagdagan ug pagsikad sa bisiklita aron lupigon ang tanang atleta.
Gitapos ni Erediano ang kompetisyon pinaagi sa 41 minutos ug 12.7 segundos pinaagi sa panglangoy sa 400 metros, 12 kilometros nga bisiklita ug 3 kilometro nga pagdagan.
“I felt some pressure especially after the swim but I just gave my best on the bike and run. I’m happy that I was able to finish strong and eventually won the race,” matod sa batang Cebuana nga mihalad sa iyang kadaugan ngadto sa iyang ginikanan ug coach.
Sa langoy, nahimutang siya sa ikasiyam human iya kining gitapos sulod sa 7:20 minutos samtang 17:31 minutos ang biseklita ug 13:44 minutos ang pagdagan.
Kini ang ikaupat nga titulo nga nakuha ni Erediano kinsa mao sab ang nahimong kampyon sa girl’s 11 to 12 years old division sa miaging tuig ug karon siya nausab ang naghara sa 13-14 division.
Nahimutang sa ikaduha ug ikatulong dapit mao ang laing mga Cebuana nga silang Nicole Marie Del Rosario ug Jeanne Marie Cañete kinsa gikan sa Talisay City Triathlon group kinsa nitapos sa kompetisyon bitbit ang 42:01.1 minutos ug 43:11.4 minutos.
Samtang wa kaabot og segundo ang deperensiya sa boys’ 13-14 division tali sa gold medalist nga si Zedrick James Borja (Laguna) ug Clifford Pusing.
Si Borja nitapos sa kompetisyon sulod sa 38:24.0 samtang 38:24.1 ang oras ni Pusing.
Ang maong titulo sa tinunan sa San Beda Alabang maoy labing una niyang titulo sa Ironkids Philippines ug nitapos sa ikatulong dapit mao si Earol Belonguil kinsa nihuman sa torneyo sulod sa 39:49.5.
Sa 11 to 12 division, gipatigbabawan ni Justin Hermosa (34:49.2) ug Kira Ellis (38.02.2) ang boys ug girls 11 to 12 division.
Nahimutang sa ikaduha ug ikatulong luna mao si Jacob Kennedy Lipura (35:52.2) ug Jacob Clint Lipura (38.02.2) samtang sila si Kelly Yin Wern Long (40.25.2) ug Arriana Danielle Lim (41.42.0) ang niokopar sa ikaduha ug ikatulo sa girls division.
Ang ubang kampyon mao silang Carron Paulter Canas (27:48.5) sa boys 9 to 10 division, Zurielle Kenzie Galo (30:08.5) sa girls 9 to 10 division, Kenshie Luke Cabando (18:52.7) sa boys 6-8 division, Christy Ann Perez (21:51.1) sa girls 6-8 division ug ang Rider Triathlon Team (22:34) relay 10-14 division ug THT Kristen (16:37.6) relay sa 6-9 division.