MGA STALL SA 2 KA DAPIT SA CARBON GUB-ON
Nameligro nga “makulban sa ilang kaldero” ang gatusan ka mga sidewalk vendor sa duha ka mga karsada nga nahimutang sa Carbon complex sa Barangay Ermita, dakbayan sa Sugbo.
Kini human moepekto ang kamanduan ni Mayor Tomas Osmeña pag-demolish sa 305 ka mga vendor, kinsa namaligya og karne, manok ug isda lakip na ang mga lamas sa dalan El Felibusterismo ug Escaño nga nahimutang duol sa barangay hall.
Si Raquel Bohol-Arce, pangulo sa Prevention Restoration Order Beautification Enhancement (Probe), nagkanayon nga ang kamanduan sa mayor niadto ra untang Hulyo 30 human sa pito ka adlaw nga notisya.
Apan wa mahinayon sanglit niduol ang mga opisyal sa Fish and Meat Vendors Asso- ciation sa Office of the Mayor hinungdan nga gihatagan sila og usa ka semana nga lugway.
Si Arce niingon nga gibasehan ni Osmeña sa iyang demolition order mao ang reklamo sa mga Chinese nga negusyante sa Carbon, kansang mga edepisyo giingon nga naalihan sa mga Sugbuanong mamaligyaay daplin sa karsada.
Ang maong mga vendor naghatag og ‘arkabala’ ngadto sa City Government balor og P10 ngadto sa P30 depende sa espasyo nga giukopar.
Usa ka vendor, kinsa nihangyo nga dili lang magpahingan, niingon nga kon ilang subayon, sila naghatag og labing menos P3,000 matag adlaw kun dul-an P1000,000 sa usa ka buwan.
Si Clarita Lesin, kinsa niadto pang dekada 70 nagsugod pagpamaligya sa maong dapit, nangaliyupo ngadto sa mayor nga di lang sila papahawaon sanglit mao ra kini ang ilang gisaligan sa panginabuhi.
Ang pangulo sa Probe nga si Arce nipahibawo nga adunay komunikasyon gikan ni acting barangay kapitan Efi Rupinta sa Ermita nga iuswag lang una ang demolition sanglit aduna silay hangyo ngadto sa mayor.
Si Arce niingon nga gi-forward na niya ngadto sa mayor ang suwat. Ang kaugmaon sa 305 ka mga vendor nagdepende sa tubag ni Osmeña human iyang gipadayag nga mohupas karong adlawa ang lugway nga gihatag sa mayor. /