Uk-uk sa noodles

BANTAY. Angayan nga magbantay karon ang mga customer sa mga restaurant kon kan-anan sulod sa mga malls ug bisan asa. Niadtong Dominggo dunay customer sa Japanese restaurant nga mireklamo nga iyang gikaon nga noodles nga dunay insekto nga, matod pa, ok-ok nga gamay pa. Di lang sa nako hinganlan ang restaurant kay wa pa man gipadangat sa customer ang iyang reklamo ngadto sa Cebu City Health Office.

Matod pa, makadaghan nangayo og pasaylo ang nagdumala sa restaurant sa nahingtungdan nga customer. Maingon nato nga wa gituyo nga masagulan og insekto ang noodles apan iya ni nga dakong obligasyon sa cook ug sa management nga limpyo ang ilang ipakaon sa mga customer.

Gani, ang ubang customer nga nakakita sa insekto di sad makatuo nga di diay limpyo ning maong restaurant nga sa pagtuo sa kadahanan nga basta gani Japanese restaurant limpyo ang ilang pagtan-aw. Tungod sa hitabo wa gipabayad ang customer, matod pa.

Ambot unsa ka kanunay nga mo-inspection ang Cebu City Health Office sa mga restaurant dinhi sa dakbayan sa Sugbo. Alang sa kasayuran sa tanan, usa sa mga obligasyon kon trabaho sa Cebu City Health Office mao pagtan-aw ug pagpasubay sa mga kananan kon restaurant sa mga balaod ug lagda sa kalimpyo.

Basin og moingon ang Cebu City Health Office nga tungod sa kadagahan na karon sa mga

restaurant di na maato og inspection sa ilang mga Sanitary

Inspectors. Daghan na man ang mga restaurant karon sa ato pa magpuno og empleyado. Pero, kaniadto nakahinumdum ko hapit kada gabii mo-inspection sa mga bars ang sanitary inspectors.

Gani, ang Cebu City Health Office dako og poder kabahin sa panglimpyo sa mga

restaurant kay mahimo man nga ipasira sa Cebu City Health Officer kon makita nga hugaw nga kusina ug mga gamit niini labina kon madiskubrehan nga daghan og mga insekto sama sa langaw, uk-uk ug uban pa. Kay ang nahitabo aning

Japanese restaurant diha sa mall ug didto pa sa Europa o Amerika, igreklamo sa customer diha-diha dayon masirhan ang maong restaurant. Apan, diri sa ato morag mahikalimtan lang. ○ ○ ○

BUYAG. Daghan ang wa mahimuot sa gibuhat ni Asec. Mocha Uson sa iyang pamaagi sa pagpasabut sa katawhan sa tuyo ug tumong sa Federalismo. Matod pa, mora og mga uragon ang tanaw ni Uson sa mga katawhan sa iyang pamaagi sa pagpasabot sa Federalismo. Ang gidemonstrar mohikap sa kinatawo ig-ingon “pe-pe” unya ighikap sa totoy moingon “de-de” unya mosinggit og “pederalismo.” Susmaryosep! Unsa na ni?