Si Vallian

Nag-inusara na lang sa kinabuhi si Vallian nga usa ka panday. Bag-o lang namatay ang iyang asawa nga si Rebecca. Duha ka semana pa lang ang nakalabay. Naghikog ang iyang asawa sa kaguol kay ang ilang panganay nga anak nasakit ug namatay nga puya pa lang. Way kabutangan ang kaguol ni Vallian.

Aron makalimot siya kang Rebecca nagpadayon siya pagpamanday. Mourong lang siya’g kadiyot kon gutmon o may sugo sa lawas o kon kapuyon na gyud. Hamubo ra siya’g kinatulgan. Daghan man siya’g suki tungod sa kamaayo niyang mopanday og sundang, sanggot, kutsilyo, baraw, bangkaw, espada ug tanang gamit nga gama sa puthaw. Gawas sa kapulido sa iyang mga hinimo, barato ra siya’g singil sa iyang serbisyo.

Ang iyang inahan nga si Ketura mitaliwan na duha ka tuig na ang nakalabay. Si Vallian wa kakita sa iyang amahan. Matod sa iyang inahan, sundalo ang iyang amahan. Godfrey ang pangalan ug namatay sa gubat sa Jerusalem tali sa mga Muslim ug Kristiyanos.

Sa ika-onse nga siglo human namatay si Hesukristo nakamatngon na’g buot si Vallian. Namatuto siya sa iyang inahan sa katarong. Gani sa wa pa mamatay sa sakit sa baga ang iyang mama, gipakulit niini kaniya sa parulos sa iyang pandayan ang usa ka maayong panultihon. Walay pultahan,

CHITO E. GERMINO Paknaan, Mandaue City, Cebu

bentana o bungbong ang iyang pandayan nga mora’g kamalig nga wa mahuman. May upat ka haligi ug atop nga gama sa kugon. Kontento na siya nga magtrabaho niining matanga sa buhatan, kay di man siya maulanan o mainitan.

Mapasigarbuhon siya nga mopasabot sa mga kustomer niya nga mangutana kon unsay buot ipasabot sa mga pulong nakulit sa parulos sa iyang pandayan. Hebrohanon man ang pinulongan sa panultihon nga nakulit. “Obligasyon sa tanang tawo nga himuong nindot puy-an ang kalibutan!” maoy itubag ni Vallian sa tanang tawo nga mangutana mahitungod niini. Kasagaran maisa ang kilay sa nangutana nga motutok kaniya nga di magtingog.

USA ka higayon diha gyuy usa ka kustomer nga midugang og pangutana.

“Unsaon man nimo pagtuman ang maong obligasyon?” matod sa kustomer.

“Isip usa ka ubos nga panday, buhaton nako nga ang akong mga produkto mao ang kinamaayuhan sa tanan. Dili ko manikas. Ipakita nako ang akong maayong panag-ingnan sa tanang tawo nga akong ikahimamat.Diyos lang ang makaubos pagtan-aw sa tawo. Busa higugmaon nako ang akong isigka tawo sama sa akong kaugalingon,” ni Vallian. Miyango-yango ang kustomer. Tungod sa maayong batasan ni Vallian giila siyang usa ka bayani sa Israel. Siya ang nahimong modelo sa moderno nga panultihon sa Iningles nga nag-ingon, “Be the best of whatever you are.” nga dugay nang gisalindot sa kadaghanan.