Batang Gilas 2-0 sa FIBA Under-18

Gipahimuslan na sab Batang Gilas ang ilang bintaha sa ilawom nga bahin sa ilang paglampornas sa United Arab Emirates, 92-49, aron irehistro ang ikaduha nilang sunodsunod nga kadaugan sa 2018 Fiba Under-18 Asian Championship sa miaging gabii sa Bangkok Thai-Japan Youth Center sa Thailand.

Ang batan-ong mga higante sa Batang Gilas nga sila si Fil-Nigerian AJ Edu, 17, ug Kai Sotto, 16, nagkumboya og 30 puntos aron pangulohan ang kadaugan.

Si 6’9” Edu adunay 16 puntos diin 12 niini iyang gimugna sa 1st half samtang ang 7’1” nga si Sotto niamot og 14 puntos.

Sayong nanginit si Edu aron hatagan ang Batang Gilas og 10-0 nga labaw nga ilang giinat ngadto sa 29-14 human sa 1st quarter.

Wala na molingi pagbalik ang Batang Gilas human niini hangtod na sa katapusang gutlo.

Dakong hinungdan sa kadaugan sa Batang Gilas mao ang ilang dominasyon sa rebounds diin ilang gipanglubong og taga liog ang UAE, 66-26.

Tanang mga magduduwa sa Batang Gilas nakatampo sa opensa diin aduna pa’y laing duha silang mga magduduwa ang nakahimo og dobleng numero nga puntos.

Sa premiro nilang duwa, gipangmakmak sab sa batang Gilas ang Lebanon.

Human sa duha ka yano nilang sunodsunod nga kadaugan, ang Batang Gilas gilaumang makasugat na’g malisod nga pagsuway sa sunod nilang tahas kay ikaharong nila ang labing gikahadlukang puwersa sa powerhouse China. Puntos matag usa Batang Gilas (92) – Edu 16, Sotto 14, Amsali 13, Torres 12, Panopio 7, Abadiano 6, Cortez 6, Lina 6, Ramirez 5, Oczon 3, Chiu 2, Ildefonso 2

UAE (49) – Alhashmi 18, Albreiki 11, Hussein 8, Ablooshi 4, Abloushi 4, Almaeeni 4.