28 ka barangay sa Cebu City naka-Tupad
Liboan ka mga wala’y trabaho sa dakbayan sa Sugbo ang natabangan sa Department of Labor and Employment (Dole) ubos sa Tulong Panghanapbuhay sa Ating Disadvantaged Workers (Tupad) nga programa niini.
Kapin sa P10 milyones usab ang napang-apud-apod sa Tupad ngadto sa mga napatrabaho niini gikan sa 28 ka mga barangay sa Cebu City.
Matod ni Dole 7 Regional Director Alvin Villamor, ang Tupad usa ka programa nga naghatag og transitional nga trabaho alang sa mga kwalipikado nga benepisyaryo sa pipila ka adlaw.
Minimum wage
“Beneficiaries worked for 15 days in various identified social, economic and agro-forestry community activities in several areas covered,” matod ni Villamor.
Matod niya, ang full minimum wage sa Cebu City ang madawat sa mga trabahante.
Ubos sa Department Order No. 173 o ang Revised Guidelines in the Implementation of the Department of Labor and Employment Integrated Livelihood and Emergency Employment Program (Dileep), naghatag kini og kahigayonan nga mopatrabaho sa mga kwalipikado og labing ubos sa 10 ngadto sa 30 ka adlaw nga trabaho.
Mga barangay
Lakip sa mga narangay nga nakapahimulos niini mao ang Guadalupe, Labangon, Pamutan, Pung-ol Sibugay, Sudlon, Pahina Central, San Nicolas, Sapangdaku, Bonbon, Tabunan, Sudlon 2, To-ong, Tagba-o, Babag, Buot;
Buhisan, Poblacion Pardo, Pasil, Inayawan, Guadalupe, Sawang Calero, Duljo-Fatima, Cogon Pardo, Basak San Nicolas, Calamba, Bulacao, Quiot, Punta Princesa, ug Suba.
Matod sa Tri-City Field Office Chief LEO nga si Emmanuel Ferrer, matag benepisyaryo nakadawat og P5,490 ug insurance coverage ubos sa Government Service Insurance System (GSIS).
Gitrabahoan kini nila niadtong Hunyo 14-27 diin ang trabaho nila mao ang pagpanglimpyo sa kadalanan ug declogging sa mga kanal ug gutter.