OSMEñA MIINSISTER NGA SWAT IPAKATAP SA DAN

Sugod karong buwana, dili na moabaga ang City Hall sa maintenance ug mo-renew sa rehistrasyon sa 90 ka sakyanan ug motorsiklo nga gitugyan ngadto sa Cebu City Police Office (CCPO).

Si Mayor Tomas Osmeña seryuso sa iyang pamahayag human iyang naobserbahan nga way taga Special Weapons And

Tactics ( Swat) sa mga patay nga nahitabo sa siyudad.

Ang mayor dili kumbinsido sa pamahayag ni CCPO Director Royina Garma nga adunay lain nga tahas ang Swat ug lahi usab ang trabaho sa Mobile Patrol Group (MPG).

Si Osmeña gusto nga mosakay sa mobile patrol car ang mga taga-Swat sulod sa 24 oras aron kon adunay alarma, dali ra sila nga makaresponde ug posible pang masikop ang responsabli.

Si Garma niingon nga iyang gipadala ang Swat sa mga lugar nga iyang gidestino para dali ra ang ilang pagresponde.

Apan iyang gihimug-atan nga ang trabaho sa Swat nakatutok sa mga sitwasyon nga nagkinahanglan sa ilang abilidad ug mo-reinforce sila sa higayon nga wala nay laing mabuhat ang ubang unit sa kapulisan.

Gibarogan sa mayor ang kasayuran nga iyang nadawat gikan sa mga informant nga dili moresponde ang Swat kon way mando sa labaw nga opisyal.

“How would you like to have a fire department, when there is fire they are not allowed to go until the commander said it’s okay to go? That’s what happening to our Swat team,” matod ni Osmeña.

Gihimong sanglitanan sa mayor ang City Hall, diin makahimo siyang makabunlot og empleyado gikan sa lainlaing departamento aron pagbuhat sa usa ka tahas ug dili makabalibad ang kawani sanglit sama ra sila nga nanarbaho sa siyudad.

Gibanabana nga moabot ngadto sa P3.6 milyones ang gastuhon sa City Government sa maintenance sa 40 ka sakyanan ug 50 ka motorsiklo ug gipahibawo ni Osmeña nga ibalik lang niya ang suporta sa higayon nga tumanon sa CCPO ang iyang hangyo.