Aron wa nay makalukso, Mactan bridges ‘ipakoral’

Aron wa nay mangambak sa duha ka taytayan sa Cebu-Mactan, mas maayo kon taoran kini og barbed wire o safety net.

Mao kini ang awhag karon sa Hunta Probinsiyal sa kagamhanan sa dakbayan sa Mandaue nga butangan og barbed wire o safety net ang Mandaue-Mactan Bridge ug ang Marcelo Fernan Bridge.

Ang duha ka tulay, labi na ang Mandaue-Mactan Bridge o first bridge, kasagaran maoy “suicide location” sa mga tawo nga di na makaantos sa kabug-at sa ilang gibati. Mangambak ni sila sa bridge aron magpakamatay.

Matod ni Bokal Victoria Corominas-Toribio, ang pagbutang og safety net o barbed wire usa ka pamaagi alang sa kaluwasan sa publiko, ilabi na niadtong dunay plano nga magkutlo sa ilang kinabuhi.

Gawas sa Mandaue, gitumbok ni Toribio nga mas maayo usab ug makatabang ang siyudad sa Lapu-Lapu sanglit anaa man sa ilang hurisdiksiyon ang katunga sa duha ka taytayan.

Inay nga maghikog, nagtuo ang opisyal nga angayang hatagan og igong pagtagad ang mga nakasinati og depresyon ug ubang matang sa mental illness.

Aron mas presentable ug dili maapektohan ang disenyo sa mga taytayan, ayuhon og taod ang barbed wire o safety net, o kaha butangan kini og mga design.

Gihangop ni Gob. Hilario Davide III ang napalabang nga resolusyon sa Provincial Board.

Si Davide, chairman sa Mactan Cebu Bridge Management Board,niingon nga maayo kini nunot sa daghan nang insidente sa hikog nga natala sa duha ka bridge.

Matod ni Davide, dunay mga closed-circuit television (CCTV) camera sa mga taytayan apan dili gihapon hingpit nga mapakgang ang mga buot maghikog kay dili man matag-an kon kanus-a usab kini motumaw.

Matod niya, angayang hatagan og igong pagtagad ang isyu sa mental health sa Sugbo, nga maoy sagad magtukmod sa pipila ka mga indibidwal nga maghikog.