Mocha gisaway nila ni Davide, Magpale

Parehong wa makauyon sila si Gobernador Hilario Davide III ug Bise Gobernador Agnes Magpale sa i-pepe, i-dede “federalism” dance video sa usa ka blogger kauban si Communications Assistant Secretary Mocha Uson.

Isip women’s rights advocate, si Magpale nihulagway nga “offensive” ang nigawas nga i-pepe i-dede federalism dance video, diin makita nga nisayaw ang usa ka blogger nga anaa si Uson.

Gihulagway ni Magpale nga di haom ang ilang gihimo sanglit seryusong hisgutanan ang pederalismo ug nagkinahanglan og mas lawom nga pagpasabot.

Lakip si Davide III sa nabastosan sa interpretasyon ni Uson ug sa kauban niining blogger sa hisgutanan sa pederalismo.

Gani matod niya, “bad taste” ang paagi nga gigamit sa duha aron ipaabot sa publiko ang hisgutanan.

Sigun sa gobernador, di kredible si Uson nga mohisgot labot sa Federalism ug mas maayong mokuha og mas angay nga tawo o opisyal nga maoy mo-splikar bahin niini, particular na kadtong kabahin sa Constitutional Commission.

Nakadayeg si Davide sa unang lakang sa ConCom nga nisuroy sa nagkadaiyang mga dapit sa nasud, lakip na dinhi sa Sugbo aron pagpasabot sa konsepto sa federalism ug sa naandam nila nga draft constitution bahin niini.

Una nang nanalipod si Uson sa nigawas nga video ug matod niya nga wa’y pundo sa gobiyerno nga nagamit alang niini.

Nasayran hinuon didto kini gi-shoot sa iyang opisina sulod sa Malacañang.

Ang Malacanang ug si Presidential Communications Secretary Martin Andanar niingon na usab nga di awtorisado si Uson paghimo og information drive bahin sa pederalismo.