Hagit ngadto ni Garma

Ambot og unsay buot ipatuo niining bag-ong hepe sa Cebu City Police Of ice nga si Senior Supt. Royina Garma ngadto sa mga Sugboanon kalabot niining iyang pamahayag nga ang Cebu malinawon lang gihapon bisan pa man niining inadlaw nga patay nga nahitabo sa palibot.

Tiaw mo bay gawas sa mga ordinaryong tawo nga yano ra nga pamatyon, pipila na usab ka mga public of icials, lakip niini mga tinugyanan usab sa balaod, ang gipangtipi nga wa gani bisan anino na lang sa kasulbaran nga maaninaw.

Daghan ang gibati na og kabalaka ning maong mga panghitabo nga labing siguro makaapekto sa turismo sa Sugbo ug makapawala sa kadasig sa mga negusyante.

Si Cebu Archbishop Jose Palma, sa interview, mipadayag usab sa iyang kabalaka ug nanawagan sa mga kadagkuan nga unta maghiusa alang sa kahusay ug kalinaw.

Ang presidente sa Philippine Retailers Associaiton (PRA)Cebu Chapter nga si Robert Go nagkanayon nga kon magpadayon kining patay nga way kasulbaran makahatag kini og bati nga imahe sa Sugbo ug natural lang nga moatras ang ilang mga counterpart didto sa Kaulohan ug apil na niini ang mga langyawng investors.

Pero tan-awa ra ni si Garma, mora og giulo-ulohan lang ang mga Sugboanon. Dili kuno angay ikaalarma sa publiko ang sunodsunod nga pagpamatay kay isolated cases ug wa silay pattern nga makita niini.

Daw sa iyang gitumbok ang pipila ka mga opisyal nga mao ray nagpatuo sa mga tawo nga ang Sugbo kuyaw ug dili na malinawon.

Pastilan. Di pa man tuod nato sinati ni si Garma kay bag-o pa lagi ning na-assign dinhi sa Sugbo, pero mora man og tabi ray nag-ayo kay pa wa man ta kadungog og duna siyay nasulbad sa mga patay.