Say you’ll stay
Gikan sa simbahan, midiretso kami si Warren sa suki namong restawran sa uptown. Ingon man ani ang among buhaton pagkahuman sa tambongan namong Santos nga Misa. Manihapon mi sa di pa mopauli.
Samtang nangaon mi, wa mi laing gihisgotan kondi ang among sitwasyon.
“Kita gyud ang naapektohan pag-ayo sa away sa atong parents, Ruby.”
Nagpanglingo si Wareen. Nakapanghupaw sab ko. parehas mig gibati si Warren, gisakitan ug nahasol gyud ming duha sa way pagkasinabtanay sa tagsa-tagsa namo ka mga ginikanan.
“Mas gipalabi nila ang tagsa-tagsa ka baroganan nga naa ron nila, Ren.”
“Sultihan na lang nato sila bahin nato, Ruby?”
“Na, ayaw sa ron kay mosamot ang ilang kasuko sa usag-usa. Seguradong hasta ta ilang kasuk-an.”
Gipugngan ko si Wareen sa iyang sugyot.
Way kasayoran ang tagsa-tagsa namo ka mga ginikanan nga nagkahinigugmaay mi. Almost one year na ang among relasyon. Bisag higpit nga magkaaway ang among mga ginikanan apan nakahigayon gihapon mi si Warren sa pagpagawas sa tagsa-tagsa namo ka pagbati. Daan na kong dunay hilom nga love kang Warren. Ug dihang iya kong gipangulitawhan kay love sab ko niya, wa ko siya paantosag dugay, gisugot dayon nako siya.
Apan ang among relasyon gihilom ug gitago namo sa tagsa-tagsa namo ka parents tungod lagi sa ilang panag-away tungod sa politika.
“Pero wa may tinagoan nga magpabilin, Ruby. Sooner or later mabulgar gyud ni.”
“Pasagdan na lang nato ng panahon nga maoy mobulgar aning tanan, Ren. Bahala na. Kon mahitabo ni, say to me now that you’ll stay with me.”
“Yes, Ruby. I’ll be stay my love, not to other girl but to you.” Nalipay ko sa gisaad ni Warren. “I’ll stay with you, too, Ren.” Apan bisan pa sa among pagsinaaray ni Warren, di ko kalikayan ang pagduha-duha kon unsa kalig-on ang pagbati namo sa usag usa. Di ba kaha kini mahugno kon mosupak gyud ang tagsa-tagsa namo ka parents bahin sa among pagminahalay?
Gamhanan ang tingog sa mga ginikanan. I believe this. Nuon, naa ra man kana sa tawo. Kon love gyud nako si Warren, ang akong gusto mao gyuy akong tumanon. Ambot lang kaha si Warren?
Unya dunay babaye nga nagsigeg tan-aw kang Warren. (SUMPAYAN)