Hinog nga bayabas

CARMELO D. LARIOSA Panadtaran, San Fernando, Cebu

Samtang nalingaw si Imok og basa sa sugilanon nga napatik sa SUPERBALITA ning Dominggoha, may nangayog katahuran. Midali siya’g lili sa geyt ug maoy iyang nakita si Adelin nga nagbarog nga nagpangamay sa iyang kamot.

“Mokkk! Imokkk! Tagai ko’g bayabas, bi! Daghana sa bunga sa inyong bayabas, uy!” singgit ni Adelin nga nagbarog gawas sa geyt. Kinoral man kining balay nilang Imok og ‘hollow block’ kay maoy gusto sa Papa niya Cinto nga tua magtrabaho sa Dubai isip civil engineer.

“Dali, sulod diri, Del. Tayming pod ka da, kay daghan na kaayong hinog sa among bayabas,” ni Imok nga miabli sa geyt.

Misulod si Adelin. Guwapa kini si Adelin nga nagkuha og kurso sa Social Works ug hapit na mahuman. Silingan sila ni Imok kay ang ilang balay tua ra man sa eskinang gamay. Nagkuha’g bulsita nga selopin si Imok ug mikatkat sa punoan sa bayabas. Gisudlan niya’g daghang hinog ang bulsita. Human nanaog siya ug gidunol kang Adelin ang bulsita nga hamabaw ang sulod. Mikaon dayon si Adelin. Sa tan-aw ni Imok morag hangol kaayo si Adelin nga mikaon sa hinog nga bayabas. Kay nag- kaon man si Adelin nagsultianay una sila sa lingkuranang kahoy diin sila nanglingkod.

“Kaila kang Noli, Mok?” hinay ang tingog ni Adelin samtang nag-usap sa bayabas.

“Noli? Ah, si Noli nga anak ni Doktor Bernabe nga dunay klinika sa lungsod. O, kaila man ko niya. Ngano man diay, Del?” ni Imok.

“Amigo mo si Noli?” ni Adelin nga mitan-aw sa nawong ni Imok.

“Di man mi amigo. Hambugeroon man na siya,” ni Imok nga miusap sa usa ka hinog nga bayabas. Didto sa ibabaw sa usa ka punoan sa bayabas nga gikuhaan ni Imok mitingog ang tamsi, “Tulihiiiii! Tulihiiiii! Tulihiiiii!”

“Di man siya hambugero. Hilumon lang. Pero okey man siya, Mok,” ni Adelin nga nagpadayon pagsima-sima sa hinog nga bayabas. “Guwapo siya, no?”

Wala motingog si Imok kay sa hilom duna siyay kaibog kang Adelin, pero kutob ra diha kay dili siya gusto nga may maghasol sa iyang hunahuna kay mokuha pa siya’g LET kun licensure examination for teachers.

Ug mao kadto nga kada hapon moanha si Adelin sa ilang Imok kay mangayo’g hinog nga bayabas. Dugay-dugay gyud ang pagsige’g anha ni Adelin sa ilang Imok. Ug nagtuo gani ang inahan ni Imok nga duna silay relasyon sa dalaga. Ug usa ka hapon nahaigking na lang si Imok sa gitaho sa iyang Mama Conching nga si Adelin mabdos, ug ang tabi-tabi diha sa eskina mao nga si Imok maoy nakapamabdos sa dalaga.

“Dili. Dili mi trato si Adelin, Ma, uy! Ngano god nga akoy pasanginlan? Tungod ba kay sigeg anhi sa ato si Adelin? Pero bayabas man ang iyang tuyo, di man ako!” Mikunot ang agtang ni Imok. “Sige lang, Ma, kay akong pakigkitaan si Adelin aron maklaro ning tabi-tabi kinsa gyud ang tag-iya sa iyang gisabak.”

Nagkita sila si Imok ug Adelin ug diretso dayon nga namulong si Imok. “Del, matayng yawaa! Ako may gidudahan sa mga silingan nato nga akoy tag-iya sa imong gimabdos! Dili ra ba. Maayo unta’g tinuod pa kay okey ra man ko.”

“Mok, sorry, ha! Nadudahan nuon ka, nga dili man unta ikaw. Si Noli man.” hinay nga namulong si Adelin.

“Si...si Noli diay? Unya unsa may iyang nasulti bahin ini?”

“Wa man. Akong nahibaw-an gikan sa ilang katabang, si Noli milarga kuno paingon sa Davao duha na ka adlaw ang milabay,” may kahinukgo ang tingog ni Adelin.

“Aw, kon di manubag si Noli sa nahitabo nimo, may tawo man nga andam nga mangamahan ana,” ni Imok nga seryusong mitutok kang Adelin. Nakasabot si Adelin nga nagpahiyom.

“Dili ka moadto sa amoa, Del? Daghan pa bayang hinog nga bayabas didto!” ni Imok nga mibawos pagpahiyom kang Adelin. (KATAPUSAN)