BATANG GILAS MITIPI SA CHINA
Mipuga si Dave Ildefonso og 18 puntos, walo niini sa third quarter, aron pangulohan ang Batang Gilas-Pilipinas sa pagpukan sa China, 73-63, niadtong Martes sa FIBA Under 18 Asian Championship sa Stadium 29 sa Bangkok, Thailand.
Sa kadaugan, perpektong gitapos sa Pilipinas ang preliminary round sa Group B, 3-0, nga sa samang higayon naghatag kanila og otomatikong luna sa quarterfinals round.
Si AJ Edu mitali og 13 puntos, 14 ka rebounds ug lima ka blocks nga giayudahan usab sa 11 puntos ni Kai Sotto nga nakalangkat usab og 10 ka rebounds ug upat ka blocks.
Saktong dominasyon ang napakita sa mga Pinoy nga gani dihay higayon nga nakabingat pa kini sa ilang labaw ngadto sa 17 puntos sa third quarter.
Nakapanghudlat pa man tuod ang China sa dihang mipakubol kini sa labaw ngadto sa sais puntos pinaagi sa tres ni Weize Jiang sa nahabiling 38 segundos, apan ang jumpshot ni Falp Panopio ug ang depensa nila ni Edu ug Sotto sa ilawom nga bahin maoy nagpapas sa paglaom sa China.
Ang upat ka free throws ni Miguel Oczon ug usa gikan kang Edu maoy naglansang sa kadaugan.
Kagahapon way duwa ang Pilipinas diin sa samang higayon nagpaabot usab sila sa modaog tali sa Chinese Taipei ug sa Bahrain nga maoy ilang makontra karong adlawa alang sa knockout stage sa quarterfinals.
Mga puntos:
Batang Gilas (73) – Ildefonso 18, Edu 13, Panopio 12, Sotto 11, Oczon 11, Torres 5, Abadiano 2, Cortez 1, Ramirez 0, Amsali 0, Lina 0, Chiu 0 China (63) – Guo 24, Jiang Q 14, Wang Q 13, Xu 7, Jiang W 5, Shi 0, Li 0, Chen 0, Wang Y 0. Quarterscores: 18-15, 31-27, 5439, 73-63.