■ NANGAYO OG TABANG:
Sila si Luzviminda Tecson ug ang iyang bana mibisita kang Gobernador Hilario Davide III (tunga) kagahapon aron pagpangayo og tabang sa dinaliang pagsulbad sa kamatayon sa ilang anak nga si Philippine Drug Enforcement Agency (PDEA) agent Von Rian Tecson.
Usa ka sinsero, agresibo ug sinaligan nga ahente sa Philippine Drug Enforcement Agency (PDEA) sa Central Visayas ang gipatay nga si Von Rian Tecson niadtong Miyerkules sa udto.
Kini ang paghulagway ni kanhi PDEA 7 director Yogi Felimon Ruiz, nga karon hepe sa Enforcement and Security Services (ESS) sa Bureau of Customs.
“He will never say no to dangerous assignments,” dugang ni Ruiz sa Superbalita Cebu.
Matod niya, wa siya makadungog nga niapil og duwa sa sindikato sa gidili nga drugas si Rian sa dihang siya pa ang regional director sa PDEA 7.
“Kana nga trabaho, naa diha ang daghang demolition job. Kana imong maayong accomplishment katumbas ana kay usa lang ka text message nga gidaot lang ka,” pahayag ni Ruiz.
Ang mga ginikanan ni Rian nagpatabang ni Gob. Hilario Davide III aron makab-ot ang hustisya alang sa ilang anak.
Si Davide ninghangyo sa National Bureau of Investigation nga susihon ang krimen aron pag-ila sa nagpaluyo sa kamatayon ni Rian ug naghunahuna nga mohatag og tabang pinansiyal sa pamilya sa namatay.
Si Rian kanhi chairman sa Sangguniang Kabataan (SK) sa ilang lugar sa Barangay Napo, siyudad sa Carcar, matod sa iyang inahan nga si Luzviminda, 63.