PULIS RA MITIPI?

MAYOR OSMEÑA, IGSUON NI TECSON NAKADAWAT OG TAHO

Pulis ba ang mibanhig patay kang Philippine Drug Enforcement Agent (PDEA) 7 agent Von Rian Tecson?

Mao ni ang nadawat nga taho sa igsuong pulis ni Tecson ug ni Cebu City Mayor Tomas Osmeña.

Apan way bisan usa ka police official nga nikompirmar niini kagahapon.

Dunay taho nga namatay ang gunman sa samad pinusilan human mabasli ni Tecson, apan laing taho niingon nga malampuson kining naoperahan sa usa ka pribadong tambalanan. “The one who shot him is also dead,” matod ni Osmeña sa interbyu sa GMA 7 Balitang Bisdak base sa iyang nadawat nga taho.

Ang Superbalita Cebu dunay ngan ug ranggo sa mao nga pulis, apan way bisan usa ka police official nga niluwat og pamahayag kalabot niini.

Base sa ngan nga nakuha ning mantalaan, ang pulis nadestino kaniadto sa Provincial Intelligence Bureau (PIB) sa Cebu Provincial Police Office (CCPO). “They are not confirming everything. How is that?”, dugang ni Osmeña, kinsa niingon nga naa kini sa iyang listahan nga nadawat.

“He’s been in my list, but no confirmation, but he is consistent in my list. List of not so nice policemen,” siya nipasabot.

IGSUON

Nasagmuyo si SPO1 Von Tecson, imbestigador sa Carcar Police station, human usab siya nakadawat og taho nga pulis ra ang niambus sa iyang manghod.

Matod ni Tecson nga nahinabi sa Superbalita Cebu, kini nga impormasyon gikan sa iyang mga higala.

Apan iyang gitataw nga way bisan usa nga nikompirmar nga police official.

Matod niya nga kon tinuod man nga pulis ang nipatay sa iyang manghod, sakit kini kaayo.

Alang kaniya nga kon duna man ganiy sala ang iyang manghod gihatagan unta kini og due process.

Samtang si Supt. Gregorio Galsim, hepe sa Carcar Police, nagkanayon nga duna silay nakuhang close circuit television (CCTV) camera sa footage sa barangay hall sa Perrelos, Carcar apan lubog ang kuha.

LEAD?

Ang Cebu Provincial Police Office moumol og special investigation task group nga maoy motutok sa kaso.

Matod ni Sr. Supt. Manuel Abrugena, hepe sa CPPO, nga aduna na silay gisundang lead, apan gisunod lang una nila ang protocol nga gipatuman sa mga imbestigador.

Usa sa ilang gitan-aw nga may kalabutan kini sa trabaho isip operatiba sa PDEA 7.

Namahayag niini si SPO1 Von Tecson nga nakatug-an kaniya ang iyang manghod nga nakadawat kinig hulga gikan sa usa ka drug lord.

“Sa ngayon, tingnan natin yung announcement ng kapatid ni Von Rian Tecson, a police investigator in Carcar

previously. Sinabi nya po na nakatanggap ang kanyang kapatid ng threat coming from unidentified drug lord na na-operate ni agent Tecson. Sa ngayon ina-identify natin yung drug lord,” matod ni Abrugena.

Ang bag-ong milingkod nga Director sa PDEA-7, Atty. Wardley Getalla, nasubo sa nahitabo kang Tecson ug misaad nga andam sila nga mokooperar sa himuon nga imbestigasyon sa kapulisan.

Tungod siya nibisita sa buhatan ni Abrugena aron mopakita og kaandam nga abli ang ilang ahensya sa mga impormasyon nga gustong masayran. /