TUMULAK GIKIHA SA CIDG 7; 3 KA KASO
Si Cebu City Councilor Dave Tumulak gipasakaan og tulo ka mga reklamo sa Criminal Investigation and Detection Group (CIDG) 7 ngadto sa piskaliya. Kini naglakip sa physical injuries, grave threat ug grave coercion.
Ang legal adviser sa CIDG 7, Inocencio de la Cerna, maoy nipadangat sa mga reklamo ngadto sa Cebu City Prosecutor’s Office.
Gipasakaan si Tumulak sa maong mga kaso subay sa giingong pagdapat ug pagti-on niini og armas ngadto sa giingong police asset nga si Michael Banua niadtong Hulyo 30 sa buntag.
Si Tumulak, sa iyang mga interview sa mga sakop sa media niadtong giingong pag-ambush kang Tejero barangay councilor Jessielou Cadungog, nanghimakak nga iyang gidapatan si Banua.
Iyang gitataw nga siya pa ang niluwas kang Banua.
Si Tumulak niingon nga andam siyang moatubang sa mga kaso aron makapanalipod sa kaugaligon.
Matod niya nga wa siya makadapat kang Banua kay wa siya sulod sa sakyanan dihang kini gidala sa ospital.
“When I arrived in the area, I saw Banua blooded. I brought him to Cebu City Medical Center. Inside the pickup vehicle of Barangay Tejero were three tanods and P02 Cabañero. I was at the back of the pick up. God knows Banua is lying,” siya niingon sa interbyu sa SunStar Cebu.
Siya pa ang nihangyo sa mga lumolupyo sa dapit nga di pasakitan si Banua.
Si Banua mao ang driver sa motorsiklo nga giluwanan ni anhing PO3 Eugene Calumba, dihang matod pa gipusil siya sa driver ni Cadungog, nga si William Macaslang.
Base sa complaint sheet, giingong nagpakitabang si Banua sa usa ka gasoline station human nasamdan si Calumba sa pagpamusil.
Human niini, may niabot nga itom nga pick-up ug nikanaog ang duha ka mga sakay ug niti-on og armas kang Banua.
Inay nga tabangan, gibalibaran matod pa siya sa maong duha ka mga tawo nga nag-uniporme og “tanod” kay matod pa hitman si Calumba.
Human niini, gitumbok diha sa reklamo nga dunay niabot nga motorsiklo nga dunay side car.
Ang sakay niini nagpaila nga siya mao si Konsehal Tumulak.
Gipangayoan siya og tabang ni Banua, apan inay nga motabang, giingong gidapog ug gisukmag siya sa konsehal sa tiyan.
Gawas niini, giingong gitiunan sab siya og armas ni Tumulak.
Gimandoan sab matod pa sa konsehal ang mga tanod nga posasan siya ug isulod sa itom nga pick-up.
Base sa alegasyon, gidapatan sab si Banua sa mga tanod.
Samtang anaa sulod sa sakyanan aron dalhon sa tambalanan, giingong padayon nga gisukmag ni Tumulak si Banua agig pagpugos kaniya pagtug-an kinsay nagsugo nila pagpapatay kang Cadungog.
Una nang gi-alegar sa driver ni Cadungog nga si Macaslang nga nisikit sa iyang gimanehong sakyanan ang motor nga giluwanan nilang Calumba ug Banua ug giingong nibunot sila sa ilang armas.
Agi og self-defense, giunhan niya sila sa pagpamusil.
Gawas sa giingong pagsukmag, gitiunan gihapon, matod pa, si Banua og armas sa iyang nawng ni Tumulak sulod sa sakyanan.
Human niini, gipasanginlan si Tumulak nga giingong pugos nga nikuha sa pitaka ni Banua nga dunay mga identification (ID) card ug kwarta nga P200. /