KILLER SA AKTIBISTA NAG-INUSARA

Tulo ka mga anggulo sa motibo ang gisunod karon sa kapulisan sa dakbayan sa Lapu-Lapu kalabot sa pagpusil-patay sa giilang aktibista nga si Butch Rosales niadtong Miyerkules sa hapon samtang nagsakay og jeep.

Sa pakisusi sa kapulisan, gituohang nag-inusara ra ang killer.

Bangi sab sa pamilya ug dumot maoy gitan-aw nga motibo sa Lapu-Lapu City Police Office (LLCPO) kalabot sa kamatayon sa negosyanteng si Ferdinand Kintanar nga gipusil-patay sa wa pa mailhing mga suspek sa Sitio Saac, Barangay Buaya, sa dakbayan niadtong Miyerkules sa gabii samtang naglingkod sud sa terrace sa iyang balay.

Matod ni Supt. Elaveo Marquez sa Investigative and Detective Management Branch (IDMB) sa LLCPO nga sa kamatayon ni Rosales, personal grudge, kalambigitan sa iligal nga drugas ug iyang pagka-sakop sa cause-oriented group maoy ilang gitan-aw nga motibo.

Nasuta ning mantalaan gikan ni Marquez padayon nilang gi-verify ang taho kon tinuod nga tiggamitan og iligal nga drugas ang biktima.

Lakip sa gisusi sa kapulisan kon adunay mga kaso nga giatubang niadto si Rosales.

Laing gisusi sa LLCPO kon unsa ang lebel sa pagka-aktibo ni Rosales sa iyang grupo nga Rise Up, grupo nga nagbatok sa extra judicial killings.

Sa paghulagway, planado ang pagpatay sa biktima base sa mga nakasaksi.

“Giplano gyud ni siya, kay ang motor gi-parking sa unahan. Igo na lang man giadto sa assailant, gisakyan ug nibiya,” ni Marquez.

Sa dihang gikuhaan og habig sa mga tigbalita, ang uyuan sa biktima nga si Konsehal Lito Pagobo sa Barangay Punta Engaño, nagkanayon nga wa silay laing mahunahunaan nga posibleng adunay maglagot sa iyang pag-umangkon kundi sa iyang pagka-aktibista.

Di na buot sa kabanay ni Rosales nga ipa-autopsy ang biktima, apan niawhag sila sa kapulisan sa dinaliang resolusyon sa kaso aron mahatagan og hustisya sa kamatayon sa biktima.

Sa laing bahin, panagbangi sa pamilya ang usa sa gitan-aw sa IDMB sa kamatayon ni Kintanar pasado alas 8 sa gabie sa maong adlaw.

Sigun ni Marquez nga sa inisyal nga pakisusi sa kapulisan, ang asawa ni Kintanar nitug-an nga adunay panagbangi sa pamilya niini niadto tali sa iyang bana.

Laing gitan-aw sa otoridad mao ang posibleng bangi sa negosyo.

Si Kintanar usa ka distributor sa softdrinks.

“Base sa information nga among nadawat, dugay na ning grudge sa mga mag-igsuon sa side sa iyang asawa but na-involved siya, kumbaga sa mga plano sa pag-subdivide sa mga property is murag siya’y nigawas nga kontrabida. So we are looking into that angle,” dugang sa opisyal.

Si Kintanar nakaangkon og daghang samad-pinusilan sa nagkadaiyang parte sa iyang lawas hinungdan sa iyang kamatayon.

Sigun ni Marquez nga atol sa pagpamanhig, nakapanira pas pultahan aron maprotektahan ang pamilya ni Kintanar ilabi na iyang mga anak kinsa nagtuon niadtong higayuna.

Human sa insidente, ang riding-in-tandem nga mga suspek daling nisakay sa ilang motor ug nisibat human nila gipusil ang biktima.